फुले, फळे, पालेभाज्यांच्या बियापासून राख्या, साताऱ्यात महिला कैदींचा अनोखा उपक्रम, VIDEO

सातारा : रक्षाबंधन हा बहीण भावाच्या अतूट नात्याची साक्ष देणारा पवित्र सण आहे. याच दिवशी बहिण भावाच्या हाताला राखी बांधून त्यांच्या दीर्घायुष्याची कामना करतात. या सणाला बाजारात अनेक आकर्षक राख्या विक्रीसाठी दाखल होत असतात. याच रक्षाबंधन सणानिमित्त सातारा कारागृहातील महिला कैद्यांच्या आकर्षक आणि रंगबिरंगी अशा वेगवेगळ्या फुलांच्या, फळांच्या बियांपासून राख्या तयार करण्यात आल्या आहेत. कारागृहातील महिला कैदींनी तयार केलेल्या अनोख्या राख्यांबद्दलची सविस्तर माहिती कारागृह अधीक्षक शमाकांत शेडगे यांनी लोकल18 शी बोलताना दिली.

या राख्या काही दिवसानंतर पडून किंवा सुटून जातात, त्या जिथे पडतील तिथे एक वृक्ष किंवा झाड लागेल, या हेतूने अशाप्रकारच्या राखी तयार करण्याचे नियोजन करण्यात आले होते, असे सातारा जिल्हा कारागृह अधीक्षक शामाकांत शेडगे यांनी सांगितले.

यामध्ये माणदेशी फाउंडेशन, शाखा सातारा येथील प्रोग्रॅम डायरेक्टर अपर्णा सावंत यांच्या योजनेअंतर्गत महिला कैदींना रक्षाबंधनाचे औचित्य साधून राखी प्रशिक्षण देण्यात आले. हे प्रशिक्षण ट्रेनर जया काळे, धनश्री पवार यांनी दिले. यामध्ये कारागृहातील सर्व महिला कैदींनी 200 हून अधिक आकर्षक व सुबक राख्या तयार केल्या आहेत.