Sharad Pawar Birthday : ''मंदिराच्या चाव्या पुजाराच्या हातात गेल्याने, विठ्ठलाचं...'', वाढदिवसाच्या बॅनरबाजीतून अजित पवारांना चिमटा

शरद पवारांच्या वाढदिवसानिमित्त बारामतीत बॅनरबाजी करण्यात आली आहे. या बॅनरवर "मंदिराच्या चाव्या पुजाराच्या हातात गेल्याने, विठ्ठलाचे महत्व कमी होत नाही" अशा आशयाचा मजकूर लिहण्यात आला आहे. या बॅनरच्या माध्यमातून शरद पवारांच्या कार्यकर्त्यांनी अजित पवारांना चिमटा काढला आहे.

खरं तर अजित पवारांनी अनेक आमदारांसह बंडखोरी करत राष्ट्रवादी दावा सांगितला होता. या दाव्यानंतर निवडणूक आयोगासमोर झालेल्या सुनावणीत अजित पवारांना राष्ट्रवादी पक्ष आणि घड्याळ चिन्ह बहाल करण्यात आलं होतं. तर शरद पवार यांच्या पक्षाला राष्ट्रवादी काँग्रेस शरदचंद्र पवार हे नाव आणि तुतारी हे चिन्ह देण्यात आलं होते. या पक्ष आणि चिन्हावर दोन्ही नेत्यांनी निवडणूक देखील लढवली होती. त्यामुळे विधानसभेत अजित पवारांनी 41 जागा जिंकल्या होत्या. तर शरद पवारांना अवघ्या 10 जागाच जिंकल्या होत्या.त्यामुळेच बॅनरवर "मंदिराच्या चाव्या पुजाराच्या हातात गेल्याने, विठ्ठलाचे महत्व कमी होत नाही" असा मजकूर लिहत अजित पवारांना डिवचलं आहे.

दरम्यान आज शरद पवारांचा वाढदिवस असल्या कारणाने अजित पवार यांनी त्यांना एक्सवरून शुभेच्छा दिल्या होत्या. त्यासोबत दिल्लीतील शरद पवारांच्या निवासस्थानी जाऊन अजित पवार आणि त्यांच्या आमदार खासदारांनी त्यांची भेट त्यांना वाढदिवसाच्या शुभेच्छा दिल्या होत्या.

शरद पवारांची भेट घेतल्यानंतर अजित पवारांनी माध्यमांशी बोलताना सांगितले की, आज शरद पवारांचा वाढदिवस आहे, उद्या प्रतिभा काकींचा वाढदिवस आहे. आजचं दोघांना भेटलो, त्यांचे दर्शन घेत आशिर्वाद घेतला असल्याचे अजित पवारांनी सांगितले. त्यांनी पुढे सांगितले, शरद पवारांसोबत राज्यातील विविध विषयांवर चर्चा झाली. परभणीमधील हिंसाचाराच्या घटनेची त्यांनी माहिती घेतली. त्याशिवाय संसदेचे हिवाळी अधिवेशन आणि राज्यातील इतर राजकीय घडामोडींबाबत चर्चा झाली असल्याचेही अजित पवारांनी सांगितले. मी कुटुंबातील सदस्य आहे, मी बाहेरचा कोणीच नाही, असेही अजित पवारांनी सांगितले. आजची भेट ही कौटुंबिक असल्याचाही निर्वाळा त्यांनी दिला.