भाजपची स्नेहा बनली महाराष्ट्रातील सर्वात तरुण नगरसेविका, 21व्या वर्षी बिनविरोध, पुतणीसाठी चुलतीची माघार

स्नेहा तमशेट्टे असं बिनविरोध निवडून आलेल्या तरुणीचं नाव आहे. नांदेड जिल्ह्याच्या मुखेड नगरपरिषदेतून तिची बिनविरोध निवड झाली आहे. तिला भाजपकडून तिकीट देण्यात आलं होतं. तिची बिनविरोध निवड झाल्याने भाजपनं नांदेड जिल्ह्यात नगरपरिषद निवडणुकीत खातं उघडलं आहे.

मुखेडमधील प्रभाग क्रमांक 4 हा महिला ओबीसीसाठी राखीव आहे. या प्रवर्गात भाजपाने स्नेहा तमशेट्टे यांना उमेदवारी दिली होती. याच प्रभागातून काँग्रेस आणि दोन अपक्ष उमेदवार देखील रिंगणात होते. मात्र उमेदवारी अर्जाच्या छाननीत काँग्रेस आणि एका अपक्ष उमेदवाराचा अर्ज बाद ठरला. अशात स्नेहा तमशेट्टे आणि त्यांची चुलती अपक्ष उमेदवार जयश्री तमशेट्टे रिंगणात होत्या.

मात्र अर्ज मागे घेण्याच्या शेवटच्या दिवशी चुलती जयश्री तमशेट्टे यांनी माघार घेतली. त्यामुळे पुतणी स्नेहा तमशेट्टे बिनविरोध निवडून आल्या. त्या बिनविरोध निवडून येताच प्रभागात जल्लोष करण्यात आला. अनेकांनी घरी येऊन स्नेहा तमशेट्टे यांनी शुभेच्छा दिल्या. स्नेहा तमशेट्टी या महाराष्ट्रातील यावर्षीच्या सर्वात तरुण नगरसेविका बनण्याचा मान मिळवला आहे. देवेंद्र फडणवीस हे २२ व्या वर्षी पहिल्यांदा नगरसेवक म्हणून निवडून आले होते.