68 तासांचा थरार संपला, पण यश परतलाच नाही! गंगेवाडीतील दगड खाणीत बुडून विद्यार्थ्याचा अंत

यश हब्बू हा कासेगाव येथील जिल्हा परिषद प्राथमिक शाळेत चौथीच्या वर्गात शिकत होता. सध्या उन्हाळ्याचे दिवस असल्याने शाळा सकाळच्या सत्रात भरत आहेत. 12 मार्च रोजी शाळा सुटल्यानंतर, यश आपल्या काही मित्रांसोबत गावापासून अवघ्या दोन किलोमीटर अंतरावर असलेल्या गंगेवाडी शिवारातील एका दगड खाणीत पोहण्यासाठी गेला होता. या खाणीत 50 फुटांहून अधिक पाणी साठलेले होते. पोहताना पाण्याचा अंदाज न आल्याने यश खोल पाण्यात बुडाला. सोबत असलेल्या मित्रांनी आरडाओरडा केल्यानंतर ही घटना उघडकीस आली.

घटनेची माहिती मिळताच सोलापूर तालुका पोलीस, सोलापूर महानगरपालिका अग्निशमन दल आणि आपत्ती व्यवस्थापन पथकाने घटनास्थळी धाव घेतली. खाणीतील पाणी आणि खोलीमुळे शोधकार्यात मोठे अडथळे येत होते. सलग तीन दिवस रात्रं-दिवस ही शोधमोहीम राबवण्यात आली. स्थानिक मच्छिमार आणि पोहणाऱ्यांचीही मदत घेण्यात आली. अखेर 68 तासानंतर रविवारी पहाटे यशचा मृतदेह पाण्यावर तरंगताना दिसला.

यशचा मृतदेह बाहेर काढल्यानंतर कासेगावमध्ये एकच आक्रोश पाहायला मिळाला. एक हुशार आणि खेळकर मुलगा अशा प्रकारे सोडून गेल्याने गावातील प्रत्येक घरांत हळहळ व्यक्त होत आहे. उन्हाळ्याच्या सुट्टीत मुले पाण्याच्या शोधात अशा धोकादायक ठिकाणी जातात, त्यामुळे पालकांनी आपल्या मुलांकडे लक्ष देण्याचे आवाहन प्रशासनाकडून करण्यात आले आहे.