ठाणेकरांसाठी मोठी बातमी! 2 दिवस पाणी जपून वापरा, महापालिकेने सांगितलं यामागचं महत्त्वाचं कारण

महापालिका क्षेत्रातील पाणी पुरवठ्याचा स्त्रोत असलेल्या महाराष्ट्र औद्योगिक विकास महामंडळाच्या पाणी पुरवठा करणाऱ्या जलवाहिनीच्या दुरुस्तीचे काम हाती घेण्यात आले आहे. यामुळेच कळवा, मुंब्रा, दिवा या शहरांत आणि ठाण्याच्या काही भागात पाणी पुरवठा शुक्रवारी पुर्ण दिवस म्हणजेच 24 तास बंद राहणार आहे. यामुळे शुक्रवारी तर पाणी येणार नाहीच. पण पुढील एक ते दोन दिवससुद्धा कमी प्रमाणात पाणी पुरवठा करण्यात येणार आहे.

दिवा आणि मुंब्रा या शहरांमध्ये कायमच पाण्याच्या टंचाईचा प्रश्न उभा असतो. मुंब्रा आणि दिव्यातील लोकांनी याआधीही अनेक वेळा पाणीटंचाई होते, म्हणून आंदोलनही केले आहे. काही दिवसांपूर्वीच मुंब्य्रात पुन्हा एकदा पाण्याच्या समस्येमुळे लोकांना आंदोलन करावे लागले होते. या सगळ्या समस्यांना नागरिक सामोरे जात असतानाच पुन्हा एकदा प्रशासनाने त्यांच्या समोर या जलवाहिनीच्या दुरुस्तीच्या कामानिमित्ताने पाणी टंचाईची समस्या उभी केली आहे. त्यामुळे नागरिकांनी 2 ते 3 दिवस पाणी जपून वापरावे, असे आवाहन करण्यात आले आहे.