Bhiwandi Accident : एकुलता एक मुलगा गेला... दिवाळीआधी कुटुंबावर दु;खाचा डोंगर, 'राज' कधीच घरी येणार नाही

मिळालेल्या माहितीनुसार, मृत तरुणाचे नाव राज सिंग असे असून राज हा आपल्या मित्रासोबत गुरुवारी पहाटे घराकडे जात होता. दरम्यान भिवंडी-कल्याण मार्गावरील टेमघर परिसरातील साईबाबा मंदिराजवळ त्याची दुचाकी रस्त्याच्या खड्ड्यामध्ये अडकून घसरली. याचवेळी मागून येणाऱ्या कंटेनरच्या चाकाखाली तो चिरडला गेला. काही क्षणांपूर्वी हसत खेळत घराकडे निघालेला राज या रस्त्याच्या खड्ड्यांमुळे एकदमच मृत्यूमुखी पडला.

राज हा आपल्या कुटुंबातील एकुलता एक मुलगा होता. बी.कॉमच्या शिक्षण घेणार राज अचानकच आपल्या कुटुंबापासून दूर गेला. त्याच्या अचानक मृत्यूने कुटुंबावर आभाळ कोसळल्यासारखा अनुभव निर्माण केला. मित्रमंडळी, शेजारी आणि नागरिक या घटनेवर आत्ताच शोक व्यक्त करत आहेत, तर राजचा मित्र या भीषण अपघातातून बचावला गेला.

मृत राजचे वडील निरंजन सिंग यांनी आक्रोश व्यक्त करत म्हटले, आणखी किती बळी गेले पाहिजेत, प्रशासन जागं होईल का? माझा एकुलता मुलगा खड्ड्यांमुळे गेला. जर रस्त्यात खड्डा नसता, आज माझा मुलगा जिवंत असता. अशी घटना कोणाशीही घडू नये म्हणून प्रशासन तात्काळ निर्णय घ्यावा.