सोन्याची अंगठी असो वा आयफोन… दानपेटीत चुकून पडताच ‘देवाचा’! तुळजाभवानी मंदिराचा वादग्रस्त फतवा

पुणे : महाराष्ट्रातील प्रसिद्ध तुळजाभवानी मंदिर हे साडेतीन शक्तिपीठांपैकी एक शक्तीपीठ आहे. लाखो भाविक दरवर्षी येथे जातात. मात्र सध्या तुळजापूरच्या तुळजाभवानी मंदिर संस्थानाचा एक निर्णय वादग्रस्त ठरताना दिसत असून त्यामुळे भाविक प्रचंड संतापले आहेत. पिंपरी-चिंचवड येथील भाविक सुरज टिंगरे यांच्यासोबत तुळजापूर येथील श्री तुळजाभवानी देवी मंदिरात घडलेला प्रकार सध्या भाविकांमध्ये तीव्र संताप निर्माण करणारा ठरत आहे. देवीच्या दर्शनासाठी श्रद्धेने आलेल्या टिंगरे यांची सुमारे एक तोळ्याची सोन्याची अंगठी चुकून दानपेटीत पडली आणि त्यानंतर सुरू झालेला न्यायासाठीचा संघर्ष आजही अनुत्तरित आहे.