Kolhapur News: गणेशोत्सव करावा की, टँकरमागे पळावं? कोल्हापूरात पाण्याची बोंबाबोंब; प्रशासन करतंय काय?

शहर आणि उपनगराला काळम्मावाडीतून आणलेल्या पाइपलाइनद्वारे पाणी पुरवठा होेते. पण काळम्मावाडी पंपातील व्हीएफडी कार्ड खराब झाल्यामुळे 3 दिवसांपासून कोल्हापूरकरांना पाणी पुरवठा व्यवस्थित होत नाही. सणासुदीच्या दिवसांमध्ये पाण्याची बोंबाबोंब झाल्यामुळे मध्यरात्रीपासून पाण्यासाठी जागे राहण्याची वेळ आली आहे. त्यामुळे नागरिकांनी प्रशासनाच्या कामाविषयी नाराजी व्यक्त केली आहे. नागरिकांचा वाढता रोष पाहून महापालिकेने टँकरने पाणीपुरवठा सुरू केला. त्यामुळे गणपतीच्या आगमनादिवशीही असाच प्रकार घडल्यामुळे नागरिक त्रस्त झाले.

बालगोपाळ तालीम, शाहू मैदान, वेताळ तालीम, बापूरामनगर, गंजीमाळ, प्रथमेशनगर, कळंबा रिंगरोड आणि ए.बी वाॅर्ड या ठिकाणी पाण्याचा पुरवठा पुरेशा दाबाने न झाल्यामुळे नागरिकांना पाण्यासाठी वणवण करावी लागत आहे. त्यामुळे पाणी पुरवठ्यामध्ये बिघाड झाला असेल तर त्वरित दुरूस्त करून तो सुरळीत करण्यात प्रयत्न महापालिकेने करायला हवा. पण प्रशासनाकडूनच बिघाड होण्यापूर्वी काळजी का घेतली जात नाही, असा सवाल आता नागरिक करत आहेत. महापालिकेने कळंबा फिल्टर हाऊसमधून 20 टँकरची व्यवस्था करून सायंकाळपर्यंत 40 फेऱ्या मारल्या. बावडा फिल्टरमधून 12 टँंकरच्या 30 फेऱ्या मारल्या आहेत.