Pune: ज्याची भर चौकात हत्या केली तो गणेश काळे कोण? त्याचा गुन्हेगारी इतिहास काय? खडी मशीन चौकातला थरार

पुणे : आंदेकर आणि कोमकर या नातलगांमधील प्रेमाची जागा द्वेषाने घेऊन काही वर्षे लोटली आहेत. संपत्तीच्या वादावरून दोन्ही कुटुंबिय एकमेकांच्या जीवावर उठलेत. सख्ख्या नात्यांचा विसर पडून एकमेकांना कायमचे संपविण्यासाठी दोन्हीकडूनही प्रयत्न होत आहेत. यात वनराज आंदेकर आणि आयुष कोमकर या दोघांचा जीव गेला. आता एकमेकांच्या टोळीतील सदस्यही एकमेकांच्या जीवावर उठले आहेत. दोन्ही टोळीतील टोळीप्रमुख गजाआड गेलेले असले तरी टोळ्यांच्या गुन्हेगारी कारवाया थांबलेल्या नाहीत. शनिवारी दुपारी दोन वाजताच्या सुमारास गणेश काळे याची भर चौकात निर्घृणपणे हत्या करण्यात आली. रिक्षातून चालेल्या गणेशवर गोळ्यांचे ४ राऊंड फायर करण्यात आले. तो गतप्राण झाल्यानंतरही त्याच्यावर कोयत्याने वार केले गेले.