Wild Flowers: डोंगरावर निसर्गाने विणला रंगीत गालिचा! करपेवाडी ठरतेय पर्यटकांसाठी आकर्षण, बघा VIDEO

साताऱ्यातील जागतिक वारसा स्थळ असलेलं कास पठार जसं विविध फुलांनी आकर्षक दिसते अगदी तसाच देखावा करपेवाडीच्या डोंगरावरही अनुभवायला मिळतो. इथे पावसाळ्यात जवळपास 15 हून अधिक प्रकारची रानफुलं एकत्र फुलून निसर्गाचा रंगीत गालिचा विणतात. या ठिकाणी गुलाबी-जांभळट गोलसर गोलवेल (माळरान गुलाब), पांढरी-करडी कुडकी (कापूस फुलं), जांभळट-निळसर शंखपुष्पी, फिकट जांभळी घंटीसारखी कावळ्याची भाकरी, पांढरी लहान दुधी, झुकलेली भारंगी (भूमीचक्र), जांभळसर कांदळ/कंदली (कारवी), लालसर-पिवळसर अग्निशिखा (गौरीची फुलं) अशी असंख्य रानफुलं फुलतात. या फुलांनी संपूर्ण डोंगर मखमली कापडासारखा भासतो.

विशेष म्हणजे Strobilanthes callosa म्हणजेच कारवी या झाडाचा फुलोरा काही ठिकाणी सात ते आठ वर्षांतून एकदाच बहरतो. तर काही उपप्रजाती दरवर्षी फुलतात. त्यामुळे या पठाराचा गालिचा प्रत्येक वर्षी वेगळ्या रंगात दिसतो. दरवर्षी या दिवसांत शाळकरी मुलं आणि आजूबाजूच्या गावांतील तरुणाई इथे भेट द्यायला येते. रंगीबेरंगी रानफुलांच्या नजाऱ्यामुळे 'मखमली पठार' हा परिसर स्थानिकांसाठीच नाही तर पर्यटकांसाठीही खास ठिकाण बनला आहे.