Niti Aayog Meet: असा होणार मराठवाडा दुष्काळमुक्त? मुख्यमंत्र्यांनी दिल्लीत मांडला प्लॅन

मुख्यमंत्री यावेळी म्हणाले की, "पश्चिम वाहिनी नद्यांचे समुद्रात जाणारे पाणी गोदावरी खोऱ्यात वळविण्यासाठी 22.9अ.घ.फुट पाणी वळविण्याची 14 हजार 40 कोटींची योजना राज्य शासन राबवणार आहे . दमणगंगा-पिंजाळ, कोकण ते गोदावरी खोरे, कोकण ते तापी खोरे, वैनगंगा-नळगंगा, तापी महाकाय पुनर्भरण अशा नदी जोड योजना राबविण्यात येणार आहेत. वैनगंगा-नळगंगा नदीजोड प्रकल्पामुळे नागपूर, वर्धा, अमरावती, यवतमाळ, अकोला व बुलढाणा जिल्ह्यातील 3 लाख 71 हजार 277 हेक्टर क्षेत्रास सिंचनाचा लाभ होणार आहे. त्यामुळे याला गती मिळाल्यास लाखो नागरिक आणि शेतकऱ्यांना लाभ होईल".

खरंतर मराठवाडा वॉटरग्रीड प्रकल्प, कृष्णा भीमा स्थिरीकरण या प्रकल्पांची चर्चा अनेक वर्षांपासून सुरू आहे. ठिकठिकाणी या योजनेची कामे अर्धवट अवस्थेत आहेत. तर काही ठिकाणी काम सुरू देखील झालेले नाही. परंतु हे प्रकल्प यशस्वी झाल्यास महाराष्ट्रातील पूर आणि दुष्काळ अशा दोन्ही समस्या मुळांपासून उखडून टाकणे शक्य होणार आहे. आता मुख्यमंत्र्यांच्या मागणीला केंद्र सरकार कसा प्रतिसाद देते, आणि या प्रकल्पांना गती मिळते का हे पाहणं महत्वाचं ठरेल. परंतु या प्रकल्पांमुळे महाराष्ट्र सुजलाम सुफलाम होवू शकतो, एवढं मात्र नक्की.