गृहिणी झाली उद्योजक! गावातच सुरू केली दालमिल, 4 महिन्यात लाखोंची कमाई

जालना: शहरी भागाच्या तुलनेत ग्रामीण भागात रोजगाराच्या संधी कमी प्रमाणात उपलब्ध असतात. मात्र काहीजण गावात राहूनच उत्पन्नाचे वेगवेगळी फंडे शोधत असतात. त्यातून भरघोस कमाई देखील होत असते. जालना जिल्ह्यातील पिरकल्याण येथील घोडके दांपत्य हे त्यापैकीच एक आहे. संगीता घोडके व अर्जुन घोडके यांनी गावातच दालमिल उद्योग उभारला आहे. या माध्यमातून शेतकऱ्यांना तूर व हरभऱ्याची डाळ तयार करून दिली जाते. तसेच डाळ विक्रीतूनही ते लाखोंची कमाई करत आहेत. याबाबतच लोकल18 च्या माध्यमातून जाणून घेऊ.

संगीता घोडके या पिरकल्याण येथील रहिवाशी असून उमेद अभियानाच्या माध्यमातून त्या वेगवेगळी कामे करतात. त्यांच्याकडे दालमिल उद्योगाबरोबरच द्राक्ष शेती, गोड्या पाण्यातील मत्स्य पालन, शेळीपालन असे व्यवसाय आहेत. या सर्व व्यवसायांच्या माध्यमातून त्या वर्षाकाठी 10 लाख रुपयांचे उत्पन्न कमवतात. त्यांचा दालमिल व्यवसाय हा केवळ चार महिने असतो, असे संगीता घोडके सांगतात.