Budget 2025: मध्यमवर्गीयांना मिळणार आनंदाची बातमी! अर्थसंकल्पात मोदी सरकार देणार मोठा दिलासा, पाकिटात राहणार अधिक पैसे

गेल्या काही महिन्यात जीवनावश्यक गोष्टींच्या किमती वाढल्याने मध्यमवर्गात मोठी नाराजी आहे. १ फेब्रुवारी २०२५ रोजी केंद्रीय अर्थसंकल्प सादर केला जाईल, ज्यात कर कपातीचा निर्णय जाहीर केला जाऊ शकतो. या  निर्णयाचा सर्वात मोठा फायदा दिल्ली आणि मुंबई सारख्या शहरात राहणाऱ्या मध्यमवर्गीय करदात्यांना होणार आहे. वाढती महागाई आणि कर यामुळे १० ते १५ लाख उत्पन्न असणाऱ्या कुटुंबियांवर अधिक भार पडत आहे.

चालू आर्थिक वर्षाच्या दुसऱ्या तिमाहीत जीडीपीमध्ये घसरण होत तो ५.४ टक्क्यांवर आला होता. त्यानंतर केंद्रीय पातळीवर अर्थव्यवस्थेची गती वाढवण्याची चर्चा सुरू झाली. २४ डिसेंबर रोजी पंतप्रधान नरेंद्र मोदींनी अर्थतज्ञांसोबत बैठक घेतली होती, ज्यात विकासाचा वेग वाढवण्यावर चर्चा झाली.अर्थतज्ञांनी कर कपात करण्याचा सल्ला दिला होता. यामुळे लोकांच्या हातात अधिक पैसे राहतील आणि ज्यामुळे खरेदीसाठी प्रोत्सहान मिळेल.