मुलींना आवडायचा सॉस, आईनं उद्योगच थाटला, आता घरातूनच होतेय 25 लाखांची कमाई

कोल्हापूर: घरात मुलींना फळांचे सॉस, जॅम, पल्प आवडायचे. पण, बाजारातील हे पदार्थ केमिकल युक्त असल्याने कोल्हापूरकर गृहिणीने हे पदार्थ घरीच बनवायला सुरुवात केली. विशेष म्हणजे मुलींसाठी सुरुवात केलेल्या या पदार्थांतून फळ प्रक्रिया उद्योग सुरू झाला आणि आता तो कोल्हापुरातील नामवंत ब्रँड झाला आहे. विशेष म्हणजे या व्यवसायातून कोल्हापूरकर मीनल भोसले या वर्षाकाळी 20 ते 25 लाख रुपयांची कमाई करत आहेत. याच व्यवसायाबाबत त्यांनी लोकल18 सोबत बोलताना माहिती दिलीये.

फळप्रक्रिया उद्योगाबाबत आजही हवी तशी जागरूकता झालेली दिसत नाही. पण हंगामातील फळांच्या उपलब्धतेनुसार घरगुती रूपात फळांवर प्रक्रिया उद्योग केला तर नक्कीच चांगले उत्पादन मिळवता येते. कोल्हापुरातील मीनल भोसले हे गेल्या अनेक वर्षांपासून फळ प्रक्रिया उद्योगात मोठ्या प्रमाणात नफा मिळवत आहे. हंगामानुसार उपलब्ध झालेल्या फळांवर प्रक्रिया करून ते स्वतः विक्री करतात. त्यासोबतच ज्यांना प्रक्रिया करून हवी आहे त्यांना मजुरी आकारून आंबा पल्प, टोमॅटो सॉस, चिंच सॉस त्यांच्यामार्फत केला जातो. छोट्या स्वरूपात सुरू केलेल्या या व्यवसायाला आज मोठ रूप मिळालेल आहे.