राष्ट्रीय महामार्गांवर प्रवास करणाऱ्यांना या स्कीममुळे मोठा फायदा होणार आहे. 15 ऑगस्ट 2025 पासून खासगी वाहनांसाठी एक Fastag-आधारित वार्षिक टोल पास उपलब्ध होणार असून त्याची किंमत 3,000 रुपये असेल. या पासच्या माध्यमातून वाहनचालकांना वर्षभरात सुमारे 7,000 पर्यंतची बचत होणार असल्याचा दावा केंद्रीय मंत्री नितीन गडकरी यांनी केला.

नितीन गडकरी यांच्या म्हणण्यानुसार 200 ट्रिपसाठी साधारपणे एक खासगी कार चालक 10,000 रुपये भरतो. तर त्या खासगी कार चालकाने जर हा पास काढला तर त्याचे 7000 रुपये वाचणार आहेत. 3000 रुपयांमध्ये कार चालकाला 200 ट्रिप मिळणार आहेत. हा पास नॅशनल हायवे, केंद्र सरकारच्या अख्यारित येणारे हायवे आणि एक्सप्रेसवेवर लागू होईल. राज्यस्तरीय टोल मार्ग, जसे की मुंबई-पुणे एक्सप्रेसवे किंवा समृद्धी महामार्ग यासारख्या महामार्गांवर पास लागू होणार नाही.

Fastag पासमुळे देशभरातील टोल प्लाझांवरील वाहतूक गतीमान होईल, लांबच लांब रांगा टळतील आणि डिजिटल पेमेंटला अधिक चालना मिळेल, असंही गडकरींनी सांगितलं. केंद्र सरकारच्या या योजनेचा सर्वसामान्य मध्यमवर्गीय वाहनधारकांना मोठा फायदा होणार असून, टोल संदर्भातील अनेक जुन्या तक्रारी आणि गैरसोयी दूर होण्याची शक्यता आहे. विशेषतः जे वाहनचालक राष्ट्रीय महामार्गांवर नियमित प्रवास करतात, त्यांच्यासाठी ही योजना आर्थिकदृष्ट्या अत्यंत फायदेशीर ठरणार आहे.

हा नवीन पास राजमार्ग यात्रा ॲप (Rajmarg Yatra App) आणि भारतीय राष्ट्रीय महामार्ग प्राधिकरण (NHAI) तसेच केंद्रीय रस्ते वाहतूक आणि महामार्ग मंत्रालय (MoRTH) यांच्या अधिकृत वेबसाइट्सद्वारे उपलब्ध होणार आहे. सरकारकडून लवकरच यासंबंधीची अधिकृत लिंक जाहीर केली जाईल. पासचा सर्वाधिक फायदा दररोज ऑफिस किंवा व्यवसायानिमित्त राष्ट्रीय महामार्गांवरून प्रवास करणाऱ्यांना होईल. यामुळे त्यांच्या प्रवासाचा खर्च लक्षणीयरीत्या कमी होईल आणि वेळेची बचत होईल. याव्यतिरिक्त, लांबच्या प्रवासाची आवड असणाऱ्यांसाठीही हा पास एक उत्तम संधी आहे.

या नवीन प्रणालीमुळे टोल प्लाझावर होणारी गर्दी आणि तासंतास ट्रॅफिकमध्ये उभे राहण्याची गरज संपेल. तसेच, वारंवार फास्टॅग वॉलेट रिचार्ज करण्याच्या त्रासातूनही सुटका होईल. सर्वात महत्त्वाचे म्हणजे, यामुळे टोल संकलनात अधिक पारदर्शकता येईल आणि टोल संबंधीचे वाद मोठ्या प्रमाणात कमी होतील. फक्त 3000 रुपयांमध्ये एक वर्षाचा हा टोल पास मिळवून तुम्ही तुमचे पैसे आणि वेळ दोन्ही वाचवू शकाल.