Success Story : कॉलेज सांभाळत व्यवसायाची वाट, सलोनीचा चीजकेक स्टॉल हिट, महिन्याची कमाई तर पाहाच

सलोनी मूळची कोकणातील आहे. लहानपणापासूनच तिला स्वयंपाकाची आवड होती. घरी आई कोकणी पदार्थ बनवत असताना ती निरीक्षण करत असे. तिसरीत असताना तिने पहिल्यांदा एक पदार्थ बनवला आणि तो उत्तम जमला. तेव्हापासून तिचा आत्मविश्वास वाढत गेला आणि ती वेगवेगळे पदार्थ बनवू लागली.

अकरावी-बारावीमध्ये असताना सलोनी आणि तिच्या आईने मिळून छोट्या प्रमाणात किचन चालवण्यास सुरुवात केली. त्यानंतर त्यांनी क्लाऊड किचनही सुरू केले. या अनुभवातूनच सलोनीला व्यवसायाची समज मिळाली आणि स्वतःचा स्टॉल सुरू करण्याची प्रेरणा मिळाली.

सलोनीने सुरुवातीला सुमारे 5000 रुपयांची गुंतवणूक करून साहित्य खरेदी केले आणि रुईया कॉलेजसमोर स्टॉल सुरू केला. तिच्या पदार्थांना विद्यार्थ्यांकडून आणि स्थानिकांकडून उत्तम प्रतिसाद मिळू लागला. सलोनीचे वडील मुंबई पोलिस दलात ट्राफिक पोलीस म्हणून कार्यरत आहेत. सुरुवातीला मुलीने रस्त्यावर स्टॉल लावावा याबाबत त्यांना थोडी शंका होती. मात्र तिची जिद्द, मेहनत आणि ग्राहकांकडून मिळणारे प्रेम पाहून त्यांनी तिला पूर्ण पाठिंबा दिला.

आज सलोनी कॉलेज शिक्षण (चौदावी) सांभाळत महिन्याला सुमारे 35 ते 40 हजार रुपये कमावत आहे. कमी गुंतवणुकीतून सुरू झालेला हा व्यवसाय तिच्यासाठी आत्मनिर्भरतेचा मार्ग ठरला आहे. सलोनी गाडीची ही कहाणी आजच्या तरुणांसाठी प्रेरणादायी आहे. शिक्षणासोबतच स्वतःच्या आवडीचा पाठपुरावा करत मेहनतीने यश मिळवता येते, हे तिने दाखवून दिले आहे.