Hapus Rate: फळांचा राजा ऑक्टोबर महिन्यातच बाजारात, मुंबईत हापूसचा भाव काय?

यंदा मुंबई फळ बाजारात हापूस सोबतच काळाबार आंबा देखील दाखल झाला आहे. कोकणातील देवगड आणि मालवण येथील प्रगतिशील आंबा बागायतदारांनी यंदा हापूस आंबे वाशी (मुंबई) आणि सातारा बाजारात पाठविण्याचा मान मिळवला आहे. देवगड तालुक्यातील पडवणे गावातील बागायतदार प्रकाश शिरसेकर यांनी हापूस आंब्याची पहिली पेटी लक्ष्मीपूजनानंतर 20 ऑक्टोबरला वाशी मार्केटला पाठवली. ही पहिली पेटी बाजारात दाखल झाल्याने आंबा प्रेमींची उत्सुकता वाढली आहे.

प्रत्येक मार्केटमध्ये आंब्यांचे दर वेगवेगळे ठरतात. मुंबईतील प्रसिद्ध क्रॉफर्ड फ्रुट मार्केटमध्ये सुद्धा हापूस आंबा पोहोचला असून, व्यापारी समीर गफर यांनी क्रॉफर्ड फ्रुट मार्केट मधील हापूस आंब्यांचे दर सांगितले आहेत.

मध्यम आकाराचा हापूस – 2000 ते 2500 रुपये डझन

लहान आकाराचा हापूस – 1500 रुपये डझन

यंदा काळाबार आंबा सुद्धा बाजारात दाखल झाला असून, त्याची किंमत 2500 रुपये डझन पासून सुरू होते. काळाबार आंबा प्रत्येक हंगामाला येत नाही; जवळपास दोन वर्षांनी किंवा वर्षाला एकदा मिळतो, त्यामुळे आंबाप्रेमींमध्ये त्याची विशेष मागणी आहे. हापूस आणि काळाबार या दोन्ही आंब्यांच्या आगमनामुळे मुंबई, वाशी आणि कोकणातील आंबा प्रेमींमध्ये खरेदीसाठी उत्साहाचे वातावरण आहे.