Mumbai Metro One : गर्दीवर उपाय! मेट्रो वनची नवी सुविधा, साडेतीन मिनिटांनी धावणार गाडी, पाहा वेळापत्रक

घाटकोपर ते वर्सोवा या 11.4 किलोमीटरच्या मार्गावर धावणारी मेट्रो वन दररोज हजारो प्रवाशांना सेवेत ठेवते. पहिली मेट्रो पहाटे 5:30 वाजता वर्सोवा आणि घाटकोपरहून सुटते, तर शेवटची मेट्रो अनुक्रमे रात्री 11:25 आणि 11:50 वाजता धावते.

सर्व मेट्रो गाड्या पूर्णपणे एअर कंडिशन्ड असून, प्रवाशांना स्वच्छ, शांत आणि आरामदायी प्रवासाचा अनुभव मिळतो. गाड्यांचे आतील भाग अग्निरोधक (फायर रिटार्डंट) असून, त्यांच्या निर्मितीसाठी स्टेनलेस स्टील कार बॉडीचा वापर केला आहे. त्यामुळे अपघात किंवा आग लागल्यास प्रवाशांचे रक्षण अधिक प्रभावीपणे करता येते.

मुंबई मेट्रो वनने विमानांच्या धर्तीवर प्रत्येक मेट्रो ट्रेनमध्ये ‘ब्लॅक बॉक्स’ बसवून नवा इतिहास घडवला आहे. भारतातील मेट्रो प्रणालीमध्ये अशा प्रकारची सुविधा प्रथमच राबविण्यात आली आहे. या ब्लॅक बॉक्समुळे आपत्कालीन प्रसंगी तांत्रिक तपासणी करणे आणि घटनेचे अचूक कारण शोधणे अधिक सोपे होते. सर्व मेट्रो एअर कंडिशन्ड असून, गाड्यांचे आतील भाग अग्निरोधक आहेत. स्टेनलेस स्टील कार बॉडीमुळे मेट्रो अधिक मजबूत आणि सुरक्षित आहे.

प्रवाशांच्या सुरक्षिततेसाठी मेट्रो वनने एण्ड-टू-एण्ड सुरक्षेची प्रभावी व्यवस्था केली आहे. प्रत्येक स्टेशन आणि गाड्यांमध्ये प्रशिक्षित सुरक्षा कर्मचारी, सीसीटीव्ही कॅमेरे, आपत्कालीन सहाय्य बटणे आणि सर्व्हिलन्स प्रणाली उपलब्ध आहेत. संशयास्पद प्रवाशांचे प्रोफाइलिंग आणि ट्रॅकिंगद्वारे संभाव्य धोके टाळले जातात.

प्रवाशांच्या सोयीसाठी मेट्रोमध्ये प्रवासी-चालक संवाद प्रणाली बसवण्यात आली आहे. यामुळे कोणत्याही आपत्कालीन परिस्थितीत प्रवासी थेट चालकांशी संपर्क साधू शकतात.