Mumbai News: नरिमन पॉईंट ते दहिसर आता सुस्साट प्रवास, लवकरच 18 मार्गिका सेवेत, कसा असणार मार्ग?

कोस्टल रोडवरील हाजी अली ज्यूस सेंटर ते मरिन ड्राइव्ह दरम्यान असणारी 15 वी आंतरमार्गिका नुकतीच खुली करण्यात आली. आता उरलेल्या तीन मार्गिका चालू महिन्यात टप्प्याटप्प्याने खुल्या करण्यात येतील. बरोदा पॅलेस ते लोटस जेट्टी, जे. के.कपूर चौक ते मरिन ड्राइव्ह आणि जे. के. कपूर चौक ते वांद्रे वरळी सी लिंक अशा तीन मार्गिका मे महिन्यात खुल्या केल्या जाणार आहेत. त्यामुळे सर्व 18 मार्गिका वाहन चालकांच्या सेवेत येतील.

मुंबईच्या दक्षिण टोकापासून ते उत्तर मुंबईच्या टोकापर्यंत वेगवान प्रवासासाठी किनारी रस्ता प्रकल्प हाती घेण्यात आला आहे. यामध्ये नरिमन पॉईंटपासून दहिसरपर्यंत कोस्टल रोड टप्प्याटप्प्याने बांधण्यात येत आहे. त्यापैकी पहिल्या टप्प्यांतर्गंत 10.58 किलोमीटरचा सागरी किनारा मार्ग उभारण्यात आला आहे. हा मार्ग शामलदास गांधी मार्ग (प्रिन्सेस स्ट्रीट उड्डाणपूल) ते वरळी वांद्रे सी लिंकच्या टोकापर्यंत असणार आहे.