Monsoon ची बदलली दिशा? कुठे राहिली पाऊस, पुढचे 10 दिवस हवामानात मोठे बदल, IMD चा अंदाज पुन्हा चुकला का?

सध्या बंगालच्या उपसागरात कमी दाबाचा पट्टा सक्रिय झाल्यामुळे ईशान्य भारतात आणि दक्षिण भारतात मुसळधार पाऊस सुरू आहे. केरळ आणि कर्नाटकच्या किनारपट्टीवर मुसळधार पावसाचा अलर्ट देण्यात आला आहे. दुसरीकडे अरबी समुद्राकडून येणाऱ्या वाऱ्यांची दिशा पाहता महाराष्ट्रात मात्र पावसाला ब्रेक लागला आहे. त्यामुळे अनेकांचं लक्ष हवामान खात्याच्या पुढच्या भाकितांकडे लागलं आहे.

हवामान खात्याने यंदा मान्सून वेळेपेक्षा लवकर येईल आणि झपाट्याने पुढे सरकेल, असा अंदाज वर्तवला होता. पण सध्या तसं काही घडताना दिसत नाही. हवामान विभागाचे माजी अधिकारी कृष्णानंद होसाळीकर सांगतात की, समुद्रसपाटीपासून सुमारे 3 किमी उंचीवर ढगांची एक मजबूत रेषा तयार झाली आहे. ही रेषा मान्सूनला पुढे जाण्यापासून थांबवत आहे. याचबरोबर, खालच्या थरातील वारे दक्षिणेकडे वाहत आहेत, त्यामुळे पावसाचा जोर कमी राहण्याची शक्यता आहे.

मुंबईत सध्या 32–33°C इतकं तापमान आहे. आर्द्रता सकाळी 90% च्या वर, तर दिवसभरात 70–75% दरम्यान राहत आहे. त्यामुळे उष्णतेचा त्रास होत असून उकाड्याने लोक हैराण झाले आहेत. हवामान विभागाच्या अंदाजानुसार, पुढचे किमान 10 दिवस राज्यभर फारसा पाऊस होण्याची शक्यता नाही. यामुळे उकाडा आणखी वाढू शकतो, साधारण दीड आठवडा हा उकाडा सहन करावा लागू शकतो.

सध्याच्या हवामान मॉडेल्सनुसार, राज्यात मान्सून 12 ते 14 जूनच्या दरम्यानच सक्रीय होण्याची शक्यता आहे. तोपर्यंत शेतीची तयारी करणाऱ्या शेतकऱ्यांनी आणि शहरातील नागरिकांनी पाण्याचा वापर काळजीपूर्वक करावा, असा सल्ला हवामान विभागाकडून देण्यात आला आहे.