Mumbai News: वर्सोवा ते दहिसर सुसाट, ‘तो’ अडथळा दूर, गेमचेंजर प्रकल्पाच्या कामाला गती

वर्सोवा-दहिसर सागरी मार्गाच्या काही भागांत मोठ्या प्रमाणात कांदळवने आणि झाडे असल्याने सीआरझेड अंतर्गत विविध परवानग्या आवश्यक होत्या. इतर सर्व मंजुरी मिळाल्या असल्या तरी वन विभागाची परवानगी न मिळाल्यामुळे या क्षेत्रातील कामे थांबली होती. महापालिकेच्या भूखंडावरील काही ठिकाणची कामे सुरू होती, मात्र सीआरझेड क्षेत्रातील कामे रखडली होती.

वर्सोवा ते दहिसर दरम्यान सुमारे 22 किलोमीटर लांबीचा हा सागरी किनारा मार्ग सहा टप्प्यांत उभारला जाणार आहे. या प्रकल्पाचा एकूण खर्च सुमारे 16 हजार 621 कोटी रुपये इतका आहे. काही भागांत दुहेरी उन्नत मार्ग तर काही ठिकाणी खाडीखालून बोगद्याद्वारे हा मार्ग विकसित करण्यात येणार आहे.

या सागरी मार्गाला गोरेगाव-मुलुंड लिंक रोडची जोड दिली जाणार असून, त्यामुळे पश्चिम आणि पूर्व द्रुतगती मार्गांवरील वाहनचालकांना मोठा दिलासा मिळण्याची शक्यता आहे. तसेच वर्सोवा-दहिसर सागरी मार्गाला दहिसर-भाईंदर उन्नत मार्गाशी जोडण्याचाही प्रस्ताव आहे.