नवी मुंबई विमानतळापर्यंत जाण्याचा प्रवास होणार सुखकर, 4 पदरी पूल बांधणार; असा आहे प्लान?

महापालिकेच्या अधिकाऱ्यांच्या मते, करंजाडेकडे जाणाऱ्या सध्याच्या पुलावर नेहमीच वाहतूक कोंडी होते. अनेकदा तासनतास वाहतूक कोंडीचा प्रश्न सुटत नाही. नवी मुंबई आंतरराष्ट्रीय विमानतळामुळे वाहतुकीचे प्रमाण आणखी वाढण्याची अपेक्षा असल्याने, पनवेल- करंजाडे मार्गावर हा एक नवीन पूल बांधण्यात येत आहे. वाहतूक कोंडीचा प्रश्न सोडण्यासाठी नवीन पूल महत्त्वाचा दुवा ठरणार असल्याचा महापालिकेला विश्वास आहे. 48.40 कोटी रुपये खर्चाच्या या प्रकल्पाला सर्वसाधारण सभेत प्रशासकीय मान्यता मिळाली. लवकरच पुलाच्या बांधकामाला सुरूवात होण्याची शक्यता आहे.

मंजूर आराखड्यानुसार, हा पूल चार पदरी असेल, त्याची लांबी 240 मीटर आणि रुंदी 21.5 मीटर असेल. हा पूल पनवेल महानगरपालिकेच्या पूर्वेकडील 40 फूट रुंदीच्या रस्त्याला पश्चिमेकडील करंजाडे नोडकडे जाणाऱ्या सिडकोच्या 20 मीटर रुंदीच्या रस्त्याशी जोडेल. या जोडणीमुळे वाहतूक लक्षणीयरीत्या सुरळीत होईल आणि भविष्यातील वाहनांच्या वाढीला चालना मिळेल,” असे अतिरिक्त आयुक्त गणेश शेटे म्हणाले. या प्रकल्पासाठी सिडको, जलसंपदा विभाग आणि सार्वजनिक बांधकाम विभागाकडून ना हरकत प्रमाणपत्रे (एनओसी) मागवली जातील. आयआयटी मुंबई किंवा व्हीजेटीआय मुंबईकडून संकल्पनात्मक डिझाइनची तांत्रिक समीक्षा आणि मंजुरी घेतली जाईल, असे शहर अभियंता संजय काटेकर यांनी पुष्टी केली.