काला घोडा आर्ट फेस्टिव्हलमध्ये मुंबई पोलिसांची एक नंबर कलाकारी, Video पाहून म्हणाल भारीच!

या चित्रांमध्ये फ्लेमिंगो पासून ते निसर्गचित्रांपर्यंत सगळ्यांचा समावेश आहे. गेल्या वर्षी फ्लेमिंगो चित्रांना विशेष पसंती मिळाल्यामुळे यंदा हे चित्र काढल्याचे अधिकाऱ्यांनी सांगितले. मुंबई पोलिसांच्या या पेंटिंग प्रदर्शनाचे हे 15 वे वर्ष आहे. जुनी मुंबई कशी होती याचे चित्र देखील काढलेले आहे. ज्यामध्ये मुंबईतील जुन्या चाळींचे बारकाईने चित्र रेखाटलेले आहे.

विकास लवंडे, रमेश चोपडे आणि संकेत राठोड यांच्या चित्रांचं प्रदर्शन इथे मांडण्यात आलंय. रमेश चोपडे यांनी कोल्हापूरच्या महालक्ष्मीचं सुंदर चित्र रेखाटलंय. या चित्राला अनेकांची पसंती मिळत आहे. हे चित्र पाहताना हुबेहूब आपण अंबाबाईच्या महालक्ष्मीलाच पाहतोय असं वाटतं.

'मी कोल्हापूर वरून फक्त काला घोडा आर्ट फेस्टिव्हल पाहण्यासाठी आलो आहे. फेस्टिव्हलमध्ये फिरताना मुंबई पोलिसांनी काढलेल्या चित्रांचा स्टॉल मला दिसला म्हणून मी पाहायला आलो तर त्यांनी काढलेले हे महालक्ष्मीचे चित्र पाहून मी थबकलोच. इतकं सुंदर चित्र काढलंय की खरंच साक्षात महालक्ष्मीच समोर आहे असंच वाटतंय, असे तिथे चित्र पाहणाऱ्या महेश महापूजी यांनी सांगितले.