महाराष्ट्रातील पहिलाच तृतीपंथीयांचा सामुदायिक विवाह सोहळा, पुण्यात 5 खास जोडपी लग्नबंधनात!

या खास विवाह सोहळ्यात हळदी, वरात, वऱ्हाडी मंडळी, संसारोपयोगी साहित्य, कन्यादान, सप्तपदी सर्व काही पाहायला मिळालं. शहरातील नागरिकांनी मोठ्या प्रमाणावर या विवाह सोहळ्यास हजेरी लावली होती. पहिल्यांदाच आयोजित केलेल्या या सोहळ्याचं सर्व स्तरातून कौतुक केलं जातंय. “लग्न करून एका बाईसारखा संसार करावा अशी इच्छा होती. यासाठी दोघांच्या घरच्यांची परवानगी आहे. हा एक आनंदाचा क्षण असून मी प्रेमाच्या धाग्यात बांधले गेले आहे,” अशा भावना नव वधूने व्यक्त केल्या.

दरम्यान, समाजाने त्यांना स्वीकारलं पाहिजे. समाज मान्यता म्हणून त्यांच्याकडे बघितलं पाहिजे. यासाठी काही करता येईल म्हणून एक छोटा प्रयत्न केला आहे. पहिल्यांदा एकच विवाह करण्याचं ठरवण्यात आलं होतं. परंतु यामध्ये अनेक लोक जोडले गेले. त्यामुळे याला सामुदायिक विवाहाचं स्वरूप प्राप्त झालं. लोकांनी मोठ्या प्रमाणात यामध्ये सहभाग घेतला. हा महाराष्ट्रातील पहिला सोहळा आहे जिथं तृतीयपंथींचा सामुदायिक विवाह झाला, अशी माहिती नाना कांबळे यांनी दिली आहे.