सुनेला मारण्यासाठी सासरच्या मंडळींचा सैतानी कट, पेढ्यांत ठासून भरलं विष; फॉरेन्सिक लॅबच्या रिपोर्टने पोलीसही हादरले

तोच पेढ्यांचा डबा नंतर जवळील दुकानचालकाच्या कुटुंबाकडे गेला. पेढे खाल्ल्यानंतर 22 वर्षीय खुशबू काथुरिया, तिचे 72 वर्षीय आजोबा आणि कुटुंबातील इतर सदस्य गंभीर आजारी पडले. उपचार सुरू असतानाच खुशबू आणि तिच्या आजोबांचा मृत्यू झाला. तिची आई आणि बहीण मात्र थोडक्यात बचावल्या. अवघ्या तीन दिवसांत तीन मृत्यू आणि समान धागा तोच पेढ्यांचा डबा. यानंतर पोलिस तपासाने वेगळेच वळण घेतले.

तपासात समोर आले की, खुशबूचा जानेवारी 2024 मध्ये विवाह झाला होता. लग्नानंतर तिने सासरच्या मंडळींकडून छळ आणि गैरवर्तन होत असल्याच्या तक्रारी केल्या होत्या. पोलिसांच्या मते, या आरोपांमुळे सासरच्या कुटुंबाला समाजात मोठा अपमान सहन करावा लागला. यातूनच सूडाची भावना निर्माण झाली. खुशबूचे सासरे झाडू कासर, दिर शुभम आणि नणंद शिवानी यांनी तिला गप्प करण्याचा कट रचल्याचा आरोप आहे.

आरोपींनी पेढ्यांमध्ये आर्सेनिक मिसळले आणि ती पिशवी खुशबूच्या वडिलांच्या दुकानाजवळ ठेवल्याचा पोलिसांचा दावा आहे. खुशबू किंवा तिच्या कुटुंबातील कोणीतरी ते पेढे खाईल, अशी त्यांची अपेक्षा होती. मात्र या कटात PHED सुरक्षा रक्षकाचा मृत्यू झाला, जो या योजनेचा भाग नव्हता. पोलिसांच्या भाषेत तो मृत्यू “कोलॅटरल डॅमेज” ठरला.

फॉरेन्सिक सायन्स लॅबच्या अहवालात पेढ्यांमधील आर्सेनिकचे प्रमाण अनुमत मर्यादेपेक्षा हजारो पटीने जास्त असल्याचे स्पष्ट झाले. इतके विष अनेकांचा जीव घेण्यासाठी पुरेसे होते. तांत्रिक आणि सायबर पुराव्यांच्या आधारे पोलिसांनी आरोपींचा माग काढला. गुन्ह्यात वापरलेली मोटरसायकल आणि मोबाईल फोन जप्त करण्यात आले आहेत.

पोलिसांनी आरोपींविरोधात भारतीय न्याय संहिता (BNS) कलम 103(1) अंतर्गत खून आणि गुन्हेगारी कट रचल्याचा गुन्हा दाखल केला आहे. या कटात आणखी कुणाचा सहभाग होता का, याचा तपास सुरू आहे.