पै-पै साठवले 40,000, शेतकऱ्याने स्कूटीसाठी पोतं भरुन आणली नाणी, Emotional VIDEO

काहीवेळा स्वप्नं सत्यात उतरवण्यासाठी फक्त हिंमत, कष्ट आणि प्रामाणिक इच्छाशक्तीची गरज असते. शेतकरी कुटुंबाने केवळ मेहनत आणि जिद्दीच्या बळावर आपले स्वप्न पूर्ण केलं. शेतकरी बापानं पोरीसाठी स्कुटर खरेदी केली तीही चक्क नाणी देऊन. सुरुवातीला इतकी नाणी पाहून घाम फुटला, थोडं विचित्रही वाटलं आणि वेगळा आनंदही शोरुममधील कर्मचाऱ्यांच्या चेहऱ्यावर होता. एका शेतकरी बापानं आपला मुलीला इतक्या कष्टानं हे गिफ्ट दिलं.

जशपूर जिल्ह्यातील बसंतपूर गावचे रहिवासी असलेले शेतकरी रामलाल यादव हे आपल्या कुटुंबासोबत जिल्हा मुख्यालयातील 'देवनारायण होंडा' शोरूममध्ये नवी स्कूटी खरेदी करण्यासाठी आले होते. त्यांच्यासोबत होती नाण्यांनी भरलेली एक मोठी गोण (बोरी). ४० हजार रुपयांच्या या नाण्यांमध्ये १० आणि २० रुपयांच्या नाण्यांचा मोठा सहभाग होता. रामलाल, त्यांची पत्नी सुनीता, मुलगा अजय आणि मुलगी राणी हे सर्वजण शोरूममध्ये हजर होते. त्यांनी गोणी उघडताच शोरूममधील कर्मचाऱ्यांची एकच धावपळ उडाली. या नाण्यांची मोजदाद करण्यासाठी कर्मचाऱ्यांना अनेक तास लागले.

आमचं कुटुंब पूर्णपणे शेतीवर अवलंबून आहे. मुलीचं लग्न झाल्यावर आता मुलाला शिक्षणासाठी स्कूटीची गरज होती. गेल्या ६ महिन्यांपासून आम्ही कुटुंबातील प्रत्येकाने मेहनत केली. भाजी विकणे, मजुरी करणे... घरातल्या प्रत्येक सदस्याने यासाठी योगदान दिले. नाणी जमा करत गेलो. अखेर ४० हजार रुपये नाणी आणि बाकीच्या नोटा घेऊन आम्ही स्कूटी घेण्यासाठी इथे आलो.” रामलाल यांना हे बोलताना भरुन आलं होतं. त्यांच्या डोळ्यात स्वप्न पूर्ण होत असल्याची एक चमक आणि भावुक करणारा क्षण अशी द्विधा मनस्थिती निर्माण झाली होती.