बदलत्या वातावरणामुळे भारतावर येऊ शकतं मोठं संकट, ISRO चा मोठा खुलासा

मुंबई : या वर्षाच्या सुरुवातीला (जानेवारी) शास्त्रज्ञांनी हिमालयाबाबत आणि हिमालयात वसलेल्या जम्मू आणि काश्मीरबाबत एक धोक्याचा इशारा दिला होता. शास्त्रज्ञांनी दिलेल्या माहितीनुसार, वाढत्या उष्णतेमुळे काश्मीरमधले 100हून अधिक अॅक्टिव्ह पर्माफ्रॉस्ट (रॉक ग्लेशियर) वितळण्याचा धोका आहे. काश्मीर खोऱ्यातलं तापमान आणखी वाढलं, तर हे ग्लेशिअर्स वितळून खोऱ्यात प्रचंड विनाश होऊ शकतो, असंही शास्त्रज्ञ म्हणाले होते. आता पुन्हा असाच काहीसा इशारा देण्यात आला आहे. इंडियन स्पेस रिसर्च ऑर्गनायझेशनच्या (इस्रो) नव्या अहवालानुसार, बर्फाळ पर्वतांनी झाकलेल्या हिमालयात धोक्याची घंटा वाजत आहे. ग्लोबल वॉर्मिंगमुळे तिथला बर्फ झपाट्याने वितळत असून, ग्लेशियल तलावांचा आकार वाढत आहे. ही परिस्थिती अशीच राहिली तर तर देशात कधीही पूर येऊ शकतो.