नियतीचा क्रूर खेळ! 10 वर्षांच्या मुलाचा 'हार्ट अटॅक'ने मृत्यू, आईच्या मांडीवर सोडला जीव

कोडोलीतील आनंदनगर वसाहतीमध्ये राहणाऱ्या गावडे कुटुंबावर नियतीने मोठा आघात केला. रोजच्याप्रमाणेच श्रावण त्याच्या मित्रांसोबत गणेश मंडळाच्या शेडमध्ये आनंदाने खेळत होता. त्याला अचानक अस्वस्थ वाटू लागले. कोणताही विचार न करता तो थेट आपल्या घराकडे धावला आणि आईच्या कुशीत शिरला. आईच्या मांडीवर डोकं ठेवताच त्याला हृदयविकाराचा तीव्र झटका आला आणि त्याच क्षणी त्याने डोळे मिटले.

घरातील आणि शेजारच्या लोकांच्या कानावर श्रावणच्या आईचा आक्रोश पडला. सर्वांनी धावपळ करून त्याला तात्काळ रुग्णालयात दाखल केले. मात्र डॉक्टरांनी त्याला मृत घोषित केले. श्रावण हा चौथीच्या वर्गात शिकत होता आणि गावडे कुटुंबाचा तो एकुलता एक मुलगा होता. चार वर्षांपूर्वीच या कुटुंबाने आपल्या मुलीला गमावले होते. या घटनेमुळे संपूर्ण गाव सुन्न झाले असून, सर्वत्र हळहळ व्यक्त केली जात आहे.