मोजणी नकाशा ते चतु:सीमेपर्यंत! शेतजमीन खरेदीचा नवीन नियम काय?

राज्य शासनाने शेतजमिनीच्या खरेदी-विक्री प्रक्रियेत पारदर्शकता आणण्यासाठी नवा नियम लागू केला आहे. त्यानुसार आता शेतजमीन खरेदी करताना मोजणीचा नकाशा आणि चतु:सीमा निश्चित करणे बंधनकारक करण्यात आले आहे.

हा निर्णय काही दिवसांपूर्वी महसूल व वन विभागाने घेतला असून, त्याची तातडीने अंमलबजावणी करण्याचे आदेश राज्यातील सर्व दुय्यम निबंधक कार्यालयांना देण्यात आले आहेत.

मात्र, या नव्या नियमामुळे शेतकरी आणि जमीन खरेदीदारांमध्ये संभ्रम आणि अडचणी वाढल्याचे चित्र सध्या दिसून येत आहे.

नवीन नियम काय? महसूल व वन विभागाने नोंदणी प्रक्रियेसंदर्भात जारी केलेल्या सुधारित नियमावलीनुसार, शासनाने प्रतिबंधित केलेल्या तुकड्यांच्या म्हणजेच 10 आर व 20 आर क्षेत्राच्या शेतजमिनीच्या खरेदीखतासाठी मोजणी नकाशा आवश्यक करण्यात आला आहे.

तसेच हा नकाशा सक्षम अधिकाऱ्याच्या परवानगीने तयार केलेला असणे बंधनकारक आहे. मात्र, २० आरपेक्षा अधिक क्षेत्रफळाच्या शेतजमिनीच्या खरेदीसाठी मोजणी नकाशाची अट लागू नसल्याचेही स्पष्ट करण्यात आले आहे.