पैशांना हातही नाही लावला, गॅस कटरने फोडले 22 लॉकर, सांगली जिल्हा बँकेत फिल्मी स्टाईल दरोडा!

आसिफ मुरसल, प्रतिनिधी सांगली: एखाद्या सस्पेन्स थ्रिलर सिनेमात शोभावा असाच काहीसा थरार आटपाडी तालुक्यातील झरे इथे घडला आहे. रात्रीचा किर्रर्र अंधार, हातामध्ये गॅस कटर आणि डोक्यात बँकेच्या तिजोरीचा नकाशा घेऊन आलेल्या अज्ञात दरोडेखोरांनी सांगली जिल्हा मध्यवर्ती बँकेच्या झरे शाखेवर अक्षरशः डल्ला मारला.

विशेष म्हणजे, ज्या पद्धतीने हा दरोडा टाकण्यात आला, ते पाहून पोलीसही चक्रावून गेले आहेत. दरोडेखोरांनी बँकेत प्रवेश करताच सर्वात आधी तंत्रज्ञानाचा काटा काढला. या चोरीतील सर्वात धक्कादायक बाब म्हणजे, चोरट्यांनी बँकेत असलेल्या रोख रकमेच्या तिजोरीकडे ढुंकूनही पाहिले नाही.

सीसीटीव्ही कॅमेऱ्यांच्या वायरी कापून टाकत पुराव्यांचा मागमूस राहू नये म्हणून 'डीव्हीआर'च लंपास केला. त्यानंतर मोर्चा वळवला तो लॉकर रूमकडे. कडक बंदोबस्तात असलेल्या या शाखेतील तब्बल २२ लॉकर गॅस कटरच्या साहाय्याने एकामागून एक कापून काढले.

फक्त ग्राहकांच्या वैयक्तिक लॉकरवरच त्यांनी डल्ला मारला. तब्बल ९ लाख ३० हजार रुपये किमतीचे सोन्या-चांदीचे दागिने घेऊन दरोडेखोर पसार झाले. रोख रक्कम तिथेच सुरक्षित ठेवून केवळ दागिने लंपास करण्याच्या या विचित्र कार्यपद्धतीमुळे हा दरोडा प्री-प्लॅन्ड असल्याचा संशय व्यक्त होत आहे.

सांगली जिल्हा मध्यवर्ती बँकेच्या इतिहासातील ही आतापर्यंतची सर्वात मोठी आणि धाडसी चोरी मानली जात आहे. सकाळी बँक उघडल्यानंतर हा प्रकार समोर येताच परिसरात एकच खळबळ उडाली. माहिती मिळताच आटपाडी पोलिसांनी घटनास्थळी धाव घेत पंचनामा केला. श्वानपथक आणि ठसेतज्ज्ञांनाही पाचारण करण्यात आले आहे.

या प्रकरणी आटपाडी पोलीस ठाण्यामध्ये अज्ञात दरोडेखोरांविरुद्ध गुन्हा दाखल करण्यात आला असून पोलीस निरीक्षक आपल्या टीमसह शोध घेत आहेत. दरम्यान, बँकेचे लॉकरच फोडले गेल्यामुळे सामान्य ग्राहकांमध्ये चिंतेचे आणि घबराटीचे वातावरण निर्माण झाले आहे. आता पोलीस या 'फिल्मी' चोरांना गजाआड कधी करतात, याकडे संपूर्ण जिल्ह्याचे लक्ष लागले आहे.