तेजश्री प्रधाननंतर नॅशनल क्रश गिरिजा ओक घेणार मुख्यमंत्री फडणवीसांची मुलाखत, कधी, कुठे?

महापालिका निवडणुकांच्या पार्श्वभूमीवर राजकीय पक्षांच्या सभा, मुलाखती आणि प्रचार जोरदार सुरू आहेत. राजकीय नेत्यांच्या मुलाखतींनी देखील सगळ्यांचं लक्ष वेधलं आहे. नुकतीच राज्याचे मुख्यमंत्री देवेंद्र फडणवीस यांची मुलाखत झाली.

'आपलं ठाणे आपला देवाभाऊ' या कार्यक्रमात अभिनेत्री तेजश्री प्रधान हिनं मुख्यमंत्र्यांची मुलाखत घेतली. त्यानंतर आता नॅशनल क्रश अभिनेत्री गिरिजा ओक मुख्यमंत्र्यांची मुलाखत घेणार आहे. कधी आणि कुठे? पाहूयात.

पुणे महापालिका निवडणुकांच्या पार्श्वभूमीवर भारतीय जनता पक्षाच्या पुणे शहर विभागाकडून शहराच्या सर्वांगीण विकासासाठी दीर्घकालीन दृष्टिकोन मांडण्याच्या उद्देशाने 'संवाद पुणेकरांशी' या विशेष संवादात्मक कार्यक्रमाचे आयोजन करण्यात आलं आहे. या कार्यक्रमात राज्याचे मुख्यमंत्री देवेंद्र फडणवीस थेट पुणेकर नागरिकांशी संवाद साधणार आहेत.

सध्या सर्वत्र चर्चेत असलेली नॅशनल क्रश गिरिजा ओक मुख्यमंत्र्यांची मुलाखत घेणार आहे. हा कार्यक्रम रविवार 11 जानेवारी रोजी सायंकाळी ७ वाजता पुण्यातील एरंडवणे परिसरातील शुभारंभ लॉन्स येथे पार पडणार आहे.

पुणे शहराच्या भविष्यातील विकास, नागरिकांच्या अपेक्षा, समस्या आणि उपाययोजना यावर या संवादाच्या माध्यमातून सविस्तर चर्चा होणार आहे. विविध क्षेत्रांतील प्रतिष्ठित नागरिक, सामाजिक कार्यकर्ते, व्यापारी, उद्योजक आणि भाजपचे पदाधिकारी या कार्यक्रमाला उपस्थित राहण्याची शक्यता आहे.

भाजपचे राज्य सरचिटणीस राजेश पांडे यांनी ही माहिती दिली. त्यांनी सांगितलं, 'संवाद पुणेकरांशी' हा कार्यक्रम पुणे शहरातील भाजपच्या सर्व प्रभाग कार्यालयांमध्ये मोठ्या पडद्यांवर थेट प्रसारित केला जाणार आहे. त्यामुळे प्रत्यक्ष कार्यक्रमस्थळी उपस्थित न राहता देखील शहरातील पाच लाखांहून अधिक नागरिक एकाच वेळी हा संवाद पाहू शकतील.

तसंच या कार्यक्रमाच्या माध्यमातून भाजपच्या 'घर चलो' संपर्क अभियानाचीही औपचारिक सुरुवात होणार आहे. दोन दिवसीय मोहिमेअंतर्गत भाजप पुणे शहरातील सुमारे 10 लाख घरांपर्यंत पोहोचण्याचे उद्दिष्ट ठेवण्यात आले आहे. या मोहिमेदरम्यान पक्षाचा निवडणूक जाहीरनामा म्हणजेच ‘संकल्पनामा’ नागरिकांपर्यंत पोहोचवला जाणार आहे, असंही राजेश पांडे यांनी सांगितलं.