प्रिया मराठेच्या निधनाच्या 7 महिन्यांनी शंतनु मोघेचं फॅन्सना मोठं सरप्राइज, नव्या प्रोजेक्टमधील फर्स्ट लूक आला समोर, PHOTO

मराठी मनोरंजन विश्वातील लाडकी अभिनेत्री प्रिया मराठेच्या निधनाने सर्वांनाच मोठा धक्का बसला. गेल्या वर्षी ३१ ऑगस्टला वयाच्या अवघ्या ३८ व्या वर्षी प्रियाने जगाचा निरोप घेतला. तिच्या निधनाने संपूर्ण कलाविश्वावर शोककळा पसरली होती.

प्रियाला कॅन्सरसारखा गंभीर आजार झाला होता. पहिल्यांदा ती या आजारातून सुखरूप बाहेर आली होती. मात्र, जेव्हा तिला दुसऱ्यांदा या आजाराची लागण झाली, तेव्हा तिला त्यातून सावरता आलं नाही. प्रियाच्या मृत्यूनंतर अनेकांनी हळहळ व्यक्त केली.

प्रियाने आजवर ‘पवित्र रिश्ता’, ‘या सुखांनो या’, ‘तू तिथे मी’, ‘तुझेच मी गीत गात आहे’, ‘तू भेटशी नव्याने’ अशा गाजलेल्या मालिकांमध्ये काम केलं होतं. तिच्या अखेरच्या दिवसांमध्ये तिचा पती अभिनेता शंतनू मोघेने तिची पालकांप्रमाणे काळजी घेतली होती.

तब्बल दोन वर्षे शंतनू प्रियाच्या सेवेला हजर होता. त्याचबरोबर तो कामही करत होता. विशेष म्हणजे प्रियाच्या निधनाच्या काही महिने आधीच शंतनूची स्टार प्रवाहच्या ‘येड लागलं प्रेमाचं’ या मालिकेत एन्ट्री झाली होती. या मालिकेत त्याने मंजिरीच्या भावाची भूमिका साकारली होती.

दरम्यान, आता प्रियाच्या निधनानंतर तब्बल सहा महिन्यांनी शंतनू पुन्हा एकदा एका नव्या मालिकेतून प्रेक्षकांच्या भेटीला येण्यासाठी सज्ज झाला आहे. यासंबंधीची पोस्ट कलर्स मराठी वाहिनीच्या सोशल मीडिया अकाउंटवर शेअर करण्यात आली आहे.

या पोस्टनुसार शंतनू कलर्स मराठी वाहिनीवरील मोहिनी या मालिकेत महत्त्वाच्या भूमिकेत दिसणार आहे. पोस्टच्या कॅप्शनमध्ये लिहिलं आहे, "स्टंट मास्टर महेंद्र देवकर यांची ओळख सांगायला गेलं तर नावच पुरेसं आहे... मोहिनी आणि तिच्या बाबांचं नातं आहे फारच अनमोल!"

पोस्टवरूनच लक्षात येतंय की यावेळी शंतनू एका दमदार भूमिकेत पाहायला मिळणार आहे. त्याला या नव्या रूपात पाहण्यासाठी मराठी प्रेक्षक आतुर झाले आहेत.