'स्वतःबद्दल खोटं...', एकीकडे अरिजीतची रिटायरमेंट, दुसरीकडे प्रसिद्ध संगीतकाराची पोस्ट VIRAL; असं का म्हणाला?

मुंबई : बॉलीवूडचा 'किंग ऑफ मेलोडी' अरिजीत सिंगने पार्श्वगायनातून निवृत्ती जाहीर करून ४८ तासांहून अधिक काळ लोटला आहे, पण या धक्क्यातून संगीत सृष्टी अजूनही सावरलेली नाही. अरिजीतने प्लेबॅक सिंगिंग सोडलं आणि सोशल मीडियावर एकच चर्चा सुरू झाली की, अरिजीतने इतका मोठा निर्णय का घेतला?

अरिजीतने या निर्णयावर आता मौन पाळलं असलं, तरी त्याच्या या एक्झिटवर इंडस्ट्रीतील बडे सेलेब्स आता आपली मतं मांडू लागले आहेत. यातच प्रसिद्ध संगीतकार आणि गायक विशाल ददलानी याने शेअर केलेली एक क्रिप्टिक पोस्ट सध्या चांगलीच व्हायरल होत आहे.

विशालने थेट अरिजीतचं नाव घेतलं नसलं, तरी त्याच्या पोस्टची टायमिंग बरंच काही सांगून जात आहे. विशालने त्याच्या इंस्टाग्रामवर एक गंभीर नोट शेअर केली आहे, ज्यात त्याने आयुष्यातील यश आणि मानसिक शांती यातील संघर्षावर भाष्य केलंय.

विशालने लिहिलंय, "यश मिळालं म्हणजे तुम्हाला मानसिक शांती मिळेलच, याची कोणतीही गॅरंटी नसते. पैसा आणि प्रसिद्धी तुम्हाला सुरक्षित ठेवू शकत नाही. आयुष्य खूप विचित्र आणि लहान आहे. तुमचा मौल्यवान वेळ वाया घालवू नका. स्वतःशी स्वतःबद्दल खोटं बोलू नका. आयुष्य जगायला शिका... मी तुम्हाला देऊ शकणारा हाच एकमेव सल्ला आहे."

२७ जानेवारीच्या रात्री अरिजीतने 'X' आणि इंस्टाग्रामवर बॉम्ब टाकला होता. "मी आता इथून पुढे कोणताही चित्रपट किंवा प्लेबॅक असाइनमेंट स्वीकारणार नाही. हा प्रवास विलक्षण होता, पण आता मी थांबतोय," असं त्याने जाहीर केलं.

अरिजीतने स्पष्ट केलं आहे की तो चित्रपट क्षेत्रातील गायकी सोडत असला, तरी त्याचे लाईव्ह शोज आणि स्वतःचे स्वतंत्र संगीत प्रयोग सुरूच राहतील. अशातच, विशाल ददलानीच्या या पोस्टमुळे आता नवीन चर्चांना उधाण आलं आहे.

अरिजीतसारखा कलाकार जेव्हा शिखरावर असताना निवृत्ती घेतो, तेव्हा त्यामागे केवळ त्याच-त्याच गोष्टींचा कंटाळा असतो की इंडस्ट्रीतील वाढता मानसिक ताण? विशालची पोस्ट याच अस्वस्थतेकडे लक्ष वेधत असल्याचं नेटकऱ्यांचं म्हणणं आहे. कलाकार जेव्हा यशाच्या मागे धावताना स्वतःला हरवून बसतो, तेव्हा त्याला अशा कठोर निर्णयाची गरज भासते, हेच विशालला सुचवायचं असावं.

अरिजीत सिंग गेल्या १५ वर्षांपासून प्रेक्षकांच्या मनावर राज्य करत आहे. 'तुम ही हो' पासून सुरू झालेलं त्याचं करिअर आता थांबलं असलं, तरी त्याची जागा कोण घेणार हा मोठा प्रश्न आहे. विशाल ददलानी, सोना महापात्रा यांसारख्या कलाकारांच्या प्रतिक्रिया पाहता, अरिजीतचा हा निर्णय बॉलिवूडच्या साचेबद्ध संगीत पद्धतीला दिलेला मोठा धक्का मानला जात आहे.