Rohini Hattangadi: 'आता सीरियल्स करणार नाही', रोहिणी हट्टंगडी टीव्ही इंडस्ट्रीवर संतापल्या, घेतला मोठा निर्णय, पण कारण काय?

मुंबई: बाफ्टा पुरस्कार जिंकणाऱ्या पहिल्या भारतीय अभिनेत्री आणि आपल्या कामाची भारतीय चित्रपटसृष्टीवर अमिट छाप सोडणाऱ्या ज्येष्ठ अभिनेत्री रोहिणी हट्टंगडी नुकतंच त्यांच्या व्यावसायिक प्रवासाबद्दल बोलल्या.

'गांधी' चित्रपटातील भूमिकेसाठी बाफ्टा पुरस्कार जिंकणाऱ्या या ७५ वर्षीय रोहिणी हट्टंगडी यांनी हिंदी, मराठी, तमिळ, तेलुगू अशा विविध भाषांमधील चित्रपटांमध्ये महत्त्वपूर्ण काम केले आहे.

मात्र, गेल्या काही काळापासून रोहिणी हट्टंगडी यांनी टीव्ही इंडस्ट्रीपासून अंतर राखले आहे. यामागील खासगी कारण त्यांनी एका मुलाखतीत उघड केले, ज्यात त्यांनी टीव्ही जगताच्या अवाजवी मागण्यांवर संताप व्यक्त केला.

रोहिणी हट्टंगडी यांनी 'द फ्री प्रेस जर्नल'ला दिलेल्या मुलाखतीत टीव्ही सीरियल्समध्ये काम न करण्याची खासगी कारणे सांगितली. त्या म्हणाल्या, "मी तरुण असताना जिम वगैरे नव्हते. पण माझे कामच माझ्यासाठी व्यायाम होते. मात्र, टेलिव्हिजन तुमच्याकडून सतत काम करण्याची मागणी करते."

त्यांना टीव्ही सीरियलसाठी पहाटे लवकर शूटिंगला जावे लागायचे आणि काम रात्री उशिरापर्यंत चालायचे. त्या रात्री ११ वाजता घरी पोहोचत आणि दुसऱ्या दिवशी सकाळी ६ वाजता पुन्हा कामासाठी उठत.

अखेरीस त्यांना जाणवले की, त्यांना स्वतःच्या व्यायामासाठी, आरामासाठी आणि साधे श्वास घेण्यासाठीही वेळ मिळत नव्हता. यामुळे त्यांनी कामाची गती कमी केली आणि टीव्ही इंडस्ट्री सोडण्याचा निर्णय घेतला.

रोहिणी हट्टंगडी यांनी मराठी टीव्ही इंडस्ट्रीतील शिस्तीच्या कमतरतेवरही आपली नाराजी व्यक्त केली. त्यांच्याकडे अनेकदा अखेरच्या क्षणी कॉल यायचे. जर एखाद्या सीनमध्ये अचानक बदल झाला किंवा नवीन सीन जोडला गेला, तर येण्यासाठी त्यांच्यावर दबाव टाकला जाई.

या अव्यवसायिक वृत्तीमुळे त्या नाराज होत असत आणि अखेरीस त्यांनी अशा पद्धतीने काम न करण्याचा निर्णय घेतला. दरम्यान, रोहिणी हट्टंगडी सध्या 'ठरलं तर मग' या मालिकेत 'पूर्णा आजी'ची भूमिका साकारत आहेत. अभिनेत्री ज्योती चांदेकर यांच्या निधनानंतर ही भूमिका आता रोहिणी हट्टंगडी साकारत आहेत आणि त्यांची मालिकेत नुकतीच एन्ट्री झाली आहे.

रोहिणी हट्टंगडी यांनी केलेल्या या वक्यव्यांमुळे मालिका विश्वातील काम करण्याच्या प्रणालीवर प्रश्नचिन्ह उभे राहिले आहेत. अशा परिस्थितीत रोहिणी यांच्यासारख्या ज्येष्ठ अभिनेत्रीच्या विधानानंतर इंडस्ट्रीमध्ये काय बदल होतो हे पाहणे महत्त्वपूर्ण ठरणार आहे.