Samantha Marriage : डिवोर्सच्या 4 वर्षांनी समांथा दुसऱ्यांदा लग्नबंधनात! बनली 'फॅमिली मॅन'ची बायको

अभिनेत्री समांथा रूथ प्रभू तिच्या वैयक्तिक आयुष्यामुळे नेहमची चर्चेत आली आहे.  पहिला नवरा नागा चैतन्यला डिवोर्स दिल्यानंतर ती आणखीच चर्चेत आली. दरम्यान पहिल्या डिवोर्सनंतर समांथाने दुसरं लग्न केल्याची माहिती समोर येत आहे.

हिंदुस्तान टाइम्सच्या वृत्तानुसार, समांथा आणि तिचा बॉयफ्रेंड राज निदिमोरू यांनी 1 डिसेंबर 2025 रोजी लग्न केलं आहे. समांथाचं आणि राज या दोघांचंही हे दुसरं लग्न आहे. समांथा आणि राज यांनी तामिळनाडूच्या कोइंब्तूर येथील ईशा योग केंद्र येथे लग्नगाठ बांधली. लग्नासाठी फक्त 30 लोकांची उपस्थिती होती.

समांथा आणि राज निदिमोरू यांच्या अफेअरच्या चर्चा गेल्या अनेक दिवसांपासून सुरू होत्या. समांथाच्या आयुष्यातील अनेक महत्त्वाच्या प्रसंगांना राजची हजेरी असल्याचं पाहायला मिळालं होतं. समांथा रूथ प्रभू आणि राज निदिमोरू यांनी त्यांच्या लग्नाची अधिकृत माहिती दिलेली नाही. मात्र या वृत्तानंतर यांच्या लग्नाची बातमी चित्रपटसृष्टीत चर्चेचा विषय बनली आहे.

अभिनेत्री समांथा रुथ प्रभूचं पहिलं लग्न अभिनेता नागा चैतन्यबरोबर झालं होतं. पण काही वर्षांत दोघांचा डिवोर्स झाला. डिवोर्सनंतर नागा चैतन्यने गेल्याच वर्षी अभिनेत्री शोभिता धुलिपाला हिच्याशी दुसरं लग्न केलं. नागा नंतर आता समांथानं देखील दुसरा संसार थाटला आहे.

टाइम्स ऑफ इंडियाच्या वृत्तानुसार, राज निदिमोरू हे एक भारतीय चित्रपट निर्माते, पटकथा लेखक आणि निर्माता आहेत. तो आणि कृष्णा डीके हे राज अँड डीके म्हणून ओळखला जातो. ते त्यांच्या क्रिएटिव्ह कंटेंटसाठी ओळखले जातात. 'द फॅमिली मॅन' ही त्याची सीरिज खूप लोकप्रिय झाली.  'द फॅमिली मॅन'चा तिसरा सीझन नुकताच रिलीज झाला आहे. ही सीरिज देशातील नंबर वन स्पाय ड्रामा मालिका म्हणून ओळखली जाते.

समांथा आणि राज यांनी एकत्रितपणे अनेक सिनेमा आणि वेब सीरिजमध्ये काम केलं आहे. 'शोर इन द सिटी', 'सिनेमा बंदी', 'गो गोवा गॉन' आणि 'अनपॉज्ड' सारखे सिनेमे तसंच 'द फॅमिली मॅन', 'सिटाडेल: हनी बनी', 'फरझी' आणि 'गन्स अँड रोझेस' सारख्या सीरिजमधून राजने त्याची ओळख निर्माण केली आहे.

राज निदिमोरूचं पहिलं लग्न  2015 मध्ये श्यामली डे सोबत झालं होतं. 2022 मध्ये दोघांचा डिवोर्स झाला. डिवोर्सनंतर राज आणि समांथा एकत्र आले. त्यांच्यातील प्रेम वाढत गेलं अखेर त्यांनी लग्न केल्याची माहिती समोर येत आहे.