नैराश्य दूर करण्यासाठी होईल मदत; पाहा हिवाळ्यात उडीद डाळ खाण्याचे आश्चर्यकारक फायदे

उडदाची डाळ हा भारतीय घरांमध्ये आढळणारा सर्वसामान्य पदार्थ आहे. उडिदामध्ये असलेल्या पोषक तत्वाविषयी आपण फारसे जागरूक नसतो. मात्र उडदाची डाळ ही अतिशय पौष्टिक असून हिवाळ्यामध्ये या डाळीचे नियमित सेवन केल्याने आपल्या आरोग्यासाठी खूप फायदे होतात.

उडदाची डाळ पचायला जड असल्याने शक्यतो हिवाळ्यामध्ये या डाळीचा समावेश आपल्या आहारामध्ये जास्त प्रमाणात केला जातो. <a href="https://news18marathi.com/maharashtra/jalna/">जालना</a> येथील आहार तज्ज्ञ गीता कोल्हे यांनी उडदाच्या डाळीचे आरोग्यदायी फायदे सांगितले आहेत.

उडदाची डाळ हिवाळ्यात प्रामुख्याने जास्त प्रमाणात खाल्ली जाते. हिवाळ्यात आपली पचनक्रिया अतिशय चांगली झालेली असते. त्यामुळे हिवाळ्यात जास्त प्रमाणात उडीद डाळ खाल्ली जाते. ही डाळ पचायला थोडी जड असते.

यामुळे शक्यतो उडीद डाळीचा आहारात समावेश सकाळीच करावा. तसेच वयोवृद्धांनी जास्त प्रमाणात उडीद डाळ खाणे टाळावे. लहान मुलांना आपण उडीद डाळीचे सूप देऊ शकतो, असे कोल्हे सांगतात.

उडदाच्या डाळीपासून आपण वेगवेगळे पदार्थ देखील करू शकतो. इडली, डोसे आणि अन्य साउथ इंडियन पदार्थ आपण उडीद डाळी पासून तयार करू शकतो. त्याचबरोबर उडदाचे वरण तसेच उडदाच्या भाकरी देखील केल्या जाऊ शकतात.

हिवाळ्यामध्ये प्रत्येक घरी उडदाच्या डाळीपासून ड्रायफ्रूटचे लाडू केले जातात. या लाडूंचे सेवन देखील आवर्जून करावे. त्याचबरोबर उडदाची डाळ भिजवून देखील आपण खाऊ शकतो.

उडदाची डाळ ही बलवर्धक, शक्तीवर्धक आहे. जे कष्टकरी लोक असतात, जे शारीरिक श्रम करतात. त्यांनी आपल्या आहारात उडीद डाळीचा समावेश आवर्जून करावा. हृदयासाठी उडदाच्या डाळीचा खूप उपयोग होतो. आपल्या रक्तवाहिन्यांमध्ये असलेला ताण हलका करण्यासाठी उडदाची डाळ उपयोगी आहे. ज्यामुळे उडदाच्या डाळीच्या नियमित सेवनाने आपले हृदय अतिशय उत्तम राहते.

नैराश्य ताण तणाव कमी करण्यासाठी देखील उडदाची डाळ अतिशय चांगले काम करते. त्याचबरोबर सकाळी उठल्यानंतर अंगावर सूज येण्याची समस्या असलेल्या लोकांसाठी देखील उडदाची डाळ अतिशय फायदेशीर आहे, असं आहार तज्ज्ञ गीता कोल्हे यांनी सांगितले.