Responsible Shopping : तुम्ही कपड्यांची खरेदी जबाबदारीने करता ना? 'या' टिप्स 5 वाचवतील तुमचे पैसे..

गरज ओळखा, अति खरेदी टाळा : कपडे खरेदी करण्यापूर्वी स्वतःला विचारा की तुम्हाला खरोखरच या कपड्यांची गरज आहे का आणि ते तुम्ही किती वेळा घालणार आहात. फक्त ट्रेंड आहे म्हणून किंवा स्वस्त मिळत आहे म्हणून कपडे खरेदी करणे टाळा. जास्त कपडे म्हणजे जास्त कचरा. तुमच्याकडे आधीच असलेले कपडे तपासा. कदाचित तुमच्याकडे आवश्यक असलेले काहीतरी आधीच असेल.

टिकाऊ आणि चांगल्या दर्जाचे कपडे निवडा : स्वस्त आणि कमी दर्जाच्या कपड्यांऐवजी थोडे महाग असले तरी, चांगले टिकणारे कपडे खरेदी करा. हे कपडे जास्त काळ वापरता येतात, ज्यामुळे कचरा कमी होतो. कपड्यांचे शिवण, फॅब्रिक आणि बटणे यांसारख्या गोष्टींची गुणवत्ता तपासा. कॉटन, लिनन, वूलन, सिल्क यांसारख्या नैसर्गिक धाग्यांपासून बनवलेले कपडे पर्यावरणासाठी चांगले असतात आणि ते जास्त टिकाऊ असतात.

नैतिक ब्रँड्सना प्राधान्य द्या : असे ब्रँड्स निवडा जे आपल्या कामगारांना योग्य वेतन देतात, चांगल्या कामाच्या परिस्थितीत ठेवतात. ब्रँड्सच्या वेबसाइटवर किंवा त्यांच्या 'CSR' रिपोर्टमध्ये याची माहिती मिळते. जे ब्रँड्स उत्पादन प्रक्रियेत पाण्याचा कमी वापर करतात, कमी प्रदूषण करतात आणि कचरा कमी करतात त्यांना प्राधान्य द्या.

सेकंड-हँड कपड्यांना संधी द्या : सेकंड-हँड कपडे खरेदी करणे हा कपड्यांचा पुनर्वापर करण्याचा उत्तम मार्ग आहे. यामुळे नवीन कपड्यांच्या उत्पादनाची गरज कमी होते आणि कचराही कमी होतो. सेकंड-हँड कपड्यांमध्ये तुम्हाला अनेकदा अद्वितीय म्हणजेच आणि विंटेज कपडे मिळतात, ज्या तुमची वैयक्तिक शैली दर्शवतात.

स्थानिक आणि लहान व्यवसायांना पाठिंबा द्या : स्थानिक कारागीर आणि लहान व्यवसायांमधून कपडे खरेदी केल्याने स्थानिक अर्थव्यवस्थेला चालना मिळते. स्थानिक व्यवसायांमधून तुम्हाला अनेकदा हाताने बनवलेले आणि पारंपरिक कला प्रकारांचे कपडे मिळतात, जे पर्यावरणासाठी चांगले असतात.

काळजीपूर्वक धुवा आणि दुरुस्त करा : कपडे कमी धुवा आणि थंड पाण्यात धुवा, कारण वारंवार धुण्याने कपडे लवकर खराब होतात. तसेच यामध्ये जास्त पाणी आणि ऊर्जा वापरली जाते. कपडे खराब झाल्यास लगेच फेकून न देता, शक्य असल्यास ते दुरुस्ती करा. छोटे फाटलेले भाग किंवा तुटलेली बटणे सहज दुरुस्त करता येतात. प्रत्येक कपड्यावर दिलेल्या 'केअर इन्स्ट्रक्शन्स' नुसार त्यांची काळजी घ्या, ज्यामुळे ते जास्त काळ टिकतील.

'ग्रीनवॉशिंग'पासून सावध रहा : काही ब्रँड्स स्वतःला 'इको-फ्रेंडली' किंवा 'टिकाऊ' असल्याचे दाखवतात, पण प्रत्यक्षात तसे नसतात. याला 'ग्रीनवॉशिंग' म्हणतात. त्यांच्या दाव्यांची सत्यता पडताळून पहा. ब्रँडची उत्पादन प्रक्रिया आणि सामग्रीबद्दल माहिती मिळवण्याचा प्रयत्न करा. या मुद्द्यांचा अवलंब करून, तुम्ही फॅशनची आवड जपण्यासोबतच पर्यावरण आणि समाजासाठी अधिक जबाबदार ग्राहक बनू शकता.