दही खाल्ल्याने सर्दी होते हा गैरसमज! पावसाळ्यात दही खाण्याचे 'हे' आहेत अद्भुत फायदे

पावसाळा सुरू झाला की बाहेरचे वातावरण अधिक थंड होते. पण त्याच वेळी, हंगामी संक्रमण, व्हायरल ताप, सर्दी आणि खोकला यांसारख्या समस्या वाढतात. अशा वेळी आपली रोगप्रतिकारशक्ती मजबूत असणे आवश्यक आहे. यासाठी आपल्याला नैसर्गिकरित्या उपलब्ध असलेले उत्तम अन्न म्हणजे दही. दह्यामध्ये असलेले प्रोबायोटिक्स पचनसंस्था व्यवस्थित काम करण्यास मदत करतात. हे आपल्या पोटातील चांगल्या जिवाणूंना वाढवतात आणि हानिकारक जिवाणूंना रोखतात. त्यामुळे पावसाळ्यात होणारे अपचन, गॅस आणि ऍसिडिटीसारखे त्रास दूर होतात.

पावसाळ्यात आहारात कोरड्या आणि उष्ण पदार्थांऐवजी दही समाविष्ट केल्याने शरीराचे तापमान संतुलित राहण्यास मदत होते. काही लोक पावसाळ्यात दही खात नाहीत, कारण त्यांना वाटते की त्यामुळे सर्दी वाढते. पण खरं तर, योग्य पद्धतीने खाल्ल्यास ते शरीरासाठी चांगले असते. ते रोगप्रतिकारशक्ती सुधारते. दह्यामधील रसायने पावसाळ्यात होणारे बुरशीजन्य संक्रमण आणि सर्दी नैसर्गिकरित्या रोखण्यास मदत करतात. दह्यामध्ये असलेले व्हिटॅमिन डी आणि व्हिटॅमिन बी12 यांसारखी पोषक तत्वे आपल्याला आवश्यक ऊर्जा देतात. त्यात कॅल्शियमही भरपूर प्रमाणात असते, जे मजबूत हाडे आणि दातांसाठी विशेष महत्त्वाचे आहे.

मात्र, पावसाळ्यात घरच्या घरी दही जमवणे थोडे अवघड जाते. कारण उन्हाळ्यात सहज जमणारे दही पावसाळ्यात तसे जमत नाही. कारण हवामान थंड आणि हवा दमट असल्यामुळे दूध लवकर लागत नाही. कधीकधी ते आंबटही होऊ शकते. म्हणूनच, काही खबरदारी घेतल्यास तुम्ही घरच्या घरी सहजपणे क्रीमी दही तयार करू शकता.

दही जमवण्यासाठी दूध कोमट असावे. दूध जास्त गरम असल्यास चव बिघडेल. थंड असल्यास दही जमायला खूप वेळ लागेल. 1 लिटर दुधासाठी 1-2 चमचे चांगले जुने दही विरजण म्हणून पुरेसे आहे. ते दुधात चांगले मिसळा आणि गरम ठिकाणी ठेवा. जर पावसाळ्यात बाहेर खूप थंडी असेल, तर थोडे आधी गरम केलेल्या ओव्हनमध्ये किंवा टॉवेलने झाकून उबदार ठेवा.

दही खाल्ल्याने केवळ रोगप्रतिकारशक्तीच वाढत नाही, तर त्वचा निरोगी आणि चमकदार होते. काही लोकांना पावसाळ्यात त्वचेच्या समस्या जास्त होतात. दह्याचे गुणधर्म या कमी करण्यास मदत करतात. शिवाय, दररोज संध्याकाळी कमी प्रमाणात दही खाल्ल्याने पचनसंस्थेला अन्न पचण्यास मदत होते आणि रात्री निरोगी झोप लागण्यासही मदत होते. तज्ज्ञ दह्याचा आपल्या रोजच्या आहारात समावेश करण्याचा सल्ला देतात.

म्हणूनच, पावसाळ्यात 'खूप थंड' आहे म्हणून दही बाजूला ठेवू नये. तज्ज्ञ सांगतात की, काही खबरदारी घेतल्यास तुम्ही घरच्या घरी स्वादिष्ट, क्रीमी दही तयार करू शकता आणि आपले आरोग्य चांगले राखू शकता. आरोग्यासाठी दररोज आहारात दह्याचा समावेश करण्याचा सल्ला ते देतात. (टीप : हा लेख तज्ञांनी दिलेली सामान्य माहिती आहे. या माहितीची न्यूज १८ मराठीने पडताळणी केलेली नाही.)