Marathwada Weather : पुढील 24 तास धोक्याचे, मराठवाड्यात मुसळधार पाऊस कोसळणार, हवामान विभागाचा अलर्ट

मागील काही दिवसांपासून राज्यातील बहुतांश भागात पावसाने जोर धरलेला आहे. आज दिनांक 18 ऑगस्ट रोजी देखील पावसाचा अंदाज असल्याची माहिती हवामान विभागाकडून वर्तवली आहे. मराठवाड्यातील काही जिल्ह्यांमध्ये मुसळधार पावसाची शक्यता असून त्यानुसार विविध पातळीचे अलर्ट जारी करण्यात आलेले आहेत.

छत्रपती संभाजीनगर, जालना, बीड आणि लातूर या चार जिल्ह्यांना ऑरेंज अलर्ट देण्यात आला आहे. या जिल्ह्यांमध्ये मुसळधार ते अतिमुसळधार पावसाची शक्यता असल्याने प्रशासनाने सतर्कतेचा इशारा दिला आहे. ऑरेंज अलर्ट म्हणजे धोक्याची पातळी जास्त असून काही ठिकाणी पाणी साचणे आणि दैनंदिन कामकाजात अडचणी निर्माण होऊ शकतात.

मराठवाड्यातील उर्वरित चार जिल्ह्यांमध्ये म्हणजेच धाराशिव, परभणी, नांदेड आणि हिंगोली या जिल्ह्यांना यलो अलर्ट जारी केला असून हलका ते मध्यम स्वरूपाच्या पावसाची शक्यता हवामान विभागाने वर्तवली आहे. विजेचा कडकडाट आणि मेघगर्जनेसह पावसाचा अंदाज आहे.

आज दिवसभर ढगाळ वातावरण राहणार असून दुपारनंतर पावसाचा जोर अधिक वाढण्याची शक्यता आहे. काही भागात अल्पावधीत मुसळधार सरी पडू शकतात. विशेषतः ऑरेंज अलर्ट असलेल्या जिल्ह्यांमध्ये वाहतूक आणि इतर कामकाजावर परिणाम होण्याची दाट शक्यता नाकारता येत नाही.

एकूणच मराठवाड्यात जोरदार पावसाचा अंदाज असून काही जिल्ह्यांमध्ये ऑरेंज तर काही जिल्ह्यांमध्ये यलो अलर्ट जारी करण्यात आला आहे. नागरिकांनी हवामान खात्याच्या सूचनांचे पालन करत सतर्क राहणे आणि आवश्यक ती काळजी घेणे गरजेचे आहे.