Marathwada Rain: मराठवाड्यात पुन्हा हवामानात बदल, आज मुसळधार की उघडीप? पाहा आजचा अंदाज

मागील बऱ्याच दिवसांपासून पावसाने महाराष्ट्रासह मराठवाड्यातील बहुतांश भागांमध्ये हजेरी लावलेली आहे. सकाळपासूनच ढगाळ वातावरण आणि अधूनमधून पडणारा पाऊस यामुळे वातावरणात गारवा निर्माण झाला आहे.

हवामान विभागाच्या अंदाजानुसार पुढील दोन दिवसांत पावसाचा जोर काहीसा कमी असला तरी हलक्या ते मध्यम पावसाची शक्यता कायम आहे. शेतकरी वर्गासाठी हा पाऊस दिलासा देणारा ठरला असून पिकांच्या वाढीसाठी आवश्यक तेवढा ओलावा मिळत आहे.

भारतीय हवामान विभागाने दिलेल्या माहितीनुसार, 11 ऑगस्ट रोजी देखील मराठवाड्यात ढगाळ वातावरण राहणार असून काही ठिकाणी हलक्या सरींची शक्यता आहे. दिवसाचे कमाल तापमान अंदाजे 30 अंश सेल्सिअस तर किमान तापमान सुमारे 26 अंश सेल्सिअस राहील. ढगाळ वातावरणामुळे उष्णतेपासून काही प्रमाणात दिलासा मिळणार आहे.

मराठवाड्यातील संभाजीनगर, बीड, लातूर, परभणी, हिंगोली, जालना, नांदेड आणि धाराशिव या जिल्ह्यांमध्ये हलक्या ते मध्यम पावसाचा अंदाज वर्तवण्यात आला आहे. काही ठिकाणी विजांच्या कडकडाटासह पावसाची शक्यता असून त्यामुळे हवामान विभागाने नागरिकांना सतर्क राहण्याचे आवाहन केले आहे. विशेषत: शेतकऱ्यांना पिकांच्या संरक्षणासाठी योग्य ती खबरदारी घेण्याचा सल्ला देण्यात आला आहे.

या पावसामुळे खरीप हंगामातील पिकांना पुरेसा ओलावा मिळाला आहे. विशेषत: सोयाबीन, मूग, उडीद, तूर यांसारख्या पिकांच्या वाढीसाठी हा पाऊस उपयुक्त ठरत आहे.

काही भागांत मागील काही दिवसांपासून पावसाची कमतरता जाणवत होती, परंतु अलीकडील सरींमुळे जमिनीत ओलावा निर्माण झाला आहे. त्यामुळे पिकांची वाढ जोमात सुरू राहील अशी अपेक्षा आहे.

हवामान विभागाच्या पुढील अंदाजानुसार, 12 ऑगस्टपासून पावसाचा जोर आणखी वाढू शकतो. त्यामुळे मराठवाड्यातील नागरिकांनी आणि शेतकऱ्यांनी हवामान विभागाच्या सूचना लक्षात ठेवून पिकांची आणि स्वतःची सुरक्षितता सुनिश्चित करावी. पावसाच्या आगमनामुळे ग्रामीण भागात पाणीटंचाईची भीती काही प्रमाणात दूर झाली असून शेती, पिण्याचे पाणी आणि जनावरांच्या चाऱ्यासाठी पुरेसा साठा होण्यास मदत होईल.