Kolhapur Rain : कोल्हापुरात तुफान पाऊस, ठिकठिकाणी साचलं पाणी, 7 भयानक PHOTOS

गेल्या दोन दिवसांपासून कोल्हापूर शहर आणि परिसरात पावसाने थैमान घातले आहे. मंगळवारी दुपारी झालेल्या मुसळधार पावसामुळे शहरातील अनेक भागात पाणी साचले असून, जनजीवन विस्कळीत झाले आहे.

ओढे-नाल्यांना पूर आल्याने नद्यांचे स्वरूप प्राप्त झाले आहे. तर अनेक ठिकाणी झाडे कोसळल्याने वाहतूक कोंडी आणि अपघातांचा धोका वाढला आहे.

शहरातील प्रमुख चौकांमध्ये पाणी साचल्याने नागरिकांना प्रचंड त्रास सहन करावा लागत आहे. पाण्यातून रस्ता काढत चालावे लागत आहे.

सोमवार पासून असणाऱ्या ढगाळ वातावरणानंतर सुरू झालेल्या पावसाने मंगळवारी दुपारनंतर जोर धरला. सलग तीन तास मुसळधार पाऊस कोसळल्याने राजारामपुरी, शाहूपुरी, कावळा नाका, जयंती नाला यासारख्या प्रमुख भागात पाणी तुंबले.

रस्त्यांवर पाण्याचा निचरा होण्यास विलंब झाल्याने वाहनचालकांना कोंडीत अडकावे लागले. विशेषतः राजारामपुरीतील ओढ्याला पूर आल्याने परिसरातील अनेक घरांमध्ये पाणी शिरले.

यामुळे नागरिकांचे मोठे नुकसान झाले आहे. शहरातील ड्रेनेज व्यवस्था अपुरी पडल्याने पाण्याचा निचरा होण्यास अडचणी येत आहेत.

त्यामुळे स्थानिक नागरिकांनी महानगरपालिकेच्या कारभारावर तीव्र नाराजी व्यक्त केली आहे.