जखमी झालेल्या, भुकेल्या मोकाट जनावरांची गीतांजली बनली 'आई', 104 प्राण्यांना दिला आसरा!

रस्त्यावर भटकणाऱ्या, जखमी, आजारी किंवा अत्याचारग्रस्त प्राण्यांची अवस्था पाहून अनेकांना दया येते, पण काहीच लोक त्यांच्या मदतीसाठी पुढे येतात. पिंपरी-चिंचवडमधील गीतांजली तौर या तरुणीने ही जबाबदारी स्वतःच्या खांद्यावर घेतली आहे. 2019 साली सुरू केलेल्या ‘साहस’ संस्थेमार्फत त्या गेल्या सहा वर्षांपासून प्राण्यांच्या हक्कांसाठी अविरत लढा देत आहेत.

गीतांजली यांचा प्राणीसेवेचा प्रवास एका शेरू नावाच्या कुत्र्यापासून सुरू झाला. पावसात भीजत असताना त्यांनी शेरूला रेस्क्यू करून त्याच्यावर उपचार केले आणि तेव्हापासून प्राण्यांसाठी काहीतरी भव्य करायचं, हा निर्धार त्यांनी मनाशी पक्का केला. याच भावनेतून साहस संस्थेची स्थापना झाली.

आजपर्यंत त्यांनी 5 हजारांहून अधिक प्राण्यांवर उपचार केले आहेत. रस्त्यावर कोणीही आजारी किंवा जखमी प्राणी दिसला की नागरिक संस्थेशी संपर्क साधतात.

साहसची टीम प्राणी रेस्क्यू करून त्याच्यावर आवश्यक ती ट्रीटमेंट करते. जो प्राणी बरा होऊ शकतो, त्याला पुन्हा मूळ ठिकाणी सोडलं जातं, तर गंभीर स्थितीत असलेल्या प्राण्यांना संस्थेच्या शेल्टर हाऊसमध्ये ठेवून त्यांची निगा राखली जाते.

सध्या या शेल्टरमध्ये 104 प्राणी आहेत. यामध्ये कुत्र्यांसह मांजरींचाही समावेश आहे. प्राण्यांच्या उपचार, खाद्य, निवारा या सर्व गोष्टींचं व्यवस्थापन संस्थेमार्फत केलं जातं.

आता या कार्यात 17 जणांचा समावेश असून एक ॲम्ब्युलन्सही उपलब्ध आहे. त्यामुळे पिंपरी-चिंचवड परिसरात अपघातग्रस्त, जखमी किंवा गंभीर अवस्थेतील प्राण्यांची त्वरित मदत करता येते.

गीतांजली तौर यांचं हे कार्य समाजात प्राणी कल्याणाबाबत जागरूकता वाढवणारं ठरत आहे. त्यांच्या अथक प्रयत्नांमुळे अनेक निराधार प्राण्यांना नवजीवन मिळालं आहे. केवळ प्राणीप्रेमातून नव्हे, तर कर्तव्यभावनेतून सुरू झालेला हा उपक्रम अनेक तरुणांसाठी प्रेरणादायी ठरत आहे.