Pune Rain: पश्चिम महाराष्ट्रात पुन्हा हवापालट, पाहा पुणे ते कोल्हापूर पावसाचं अपडेट

राज्यात मान्सून दाखल झाल्यानंतर पावसाचा जोर ओसरला आहे. त्यामुळे पश्चिम महाराष्ट्रात तापमानात चढउतार जाणवत आहेत. आज 4 जून रोजी पश्चिम महाराष्ट्रातील घाट भागात हलक्या ते मध्यम पावसाची शक्यता वर्तवण्यात आली आहे. तर उर्वरित जिल्ह्यांत देखील तुरळक ठिकाणी हलक्या पावसाचा अंदाज आहे.

कोल्हापूर जिल्ह्यात मागील 24 तासात ढगाळ वातावरण राहिले. यावेळी तापमान 29.5 अंश सेल्सिअस राहिले. पुढील 24 तासात तुरळक ठिकाणी हलक्या पावसाची शक्यता हवामान विभागाने वर्तविली आहे. तसेच कोल्हापूरच्या घाटमाथ्यावर देखील हलक्या पावसाची शक्यता आहे. कमाल तापमान 32 अंश सेल्सिअस राहिल.

सातारा जिह्यात शेतीच्या कामांना गती आली आहे. सध्या पावसाने उघडीत घेतली असली तरीही आकाश साधारणपणे ढगाळ राहत आहे. पुढील 24 तासात कमाल तापमान 32 अंश सेल्सिअस राहिल. अंशतः ढगाळ आकाशासह तुरळक ठिकाणी रिमझिम पावसाचा अंदाज हवामान विभागाकडून सांगण्यात आला आहे.

सोलापूर जिल्ह्यातील तापमानात वाढ होत असून मागील 24 तासात पारा 35.5 अंशावर पोहोचला. तसेच पुढील 24 तासात पारा 35 अंशावर स्थिर राहण्याचा अंदाज आहे. तुरळक ठिकाणी मात्र ढगाळ आकाशासह रिमझिम पावसाचा अंदाज हवामान विभागाने दिला आहे.

सांगली जिल्ह्यात अवकाळी पावसापूर्वी झालेल्या हळद लागणीस अवकाळी पोषक ठरला आहे. पावसाने उघडीप दिल्याने शेतीच्या कामांनी गती घेतली आहे. मागील 24 तासात 32 अंश सेल्सिअस कमाल तापमानाची नोंद झाली. तसेच पुढील 24 तासात तूरळक ठिकाणी हलक्या पावसासह आकाश ढगाळ असेल.

पुणे जिल्ह्यातील कमाल तापमानात वाढ होऊन 32.3 अंश सेल्सिअस नोंद झाली. पुढील 24 तासात पुण्यातील आकाश निरभ्र राहण्याचे संकेत आहेत. यावेळी कमाल तापमान 34 अंश सेल्सिअस तर किमान तापमान 24 अंश सेल्सिअस राहिल.

पश्चिम महाराष्ट्रात अंशतः ढगाळ हवामान आहे. मात्र उन्हाचा चटका आणि उकाडा वाढला आहे. पुढील काही काळ हवामानाची हीच स्थिती कायम राहण्याची शक्यता हवामान विभागाने वर्तवली आहे.