Weather Alert: पश्चिम महाराष्ट्रात धो धो कोसळणार, पुण्याला यलो अलर्ट, गुरुवारचा हवामान अंदाज

बंगालच्या उपसागरातील कमी दाब क्षेत्रामुळे राज्यात पावसाचा जोर वाढला आहे. आज 4 सप्टेंबर रोजी कोकण, घाटमाथा, उत्तर महाराष्ट्रात जोरदार पावसाची शक्‍यता असल्याने दक्षतेचा ऑरेंज अलर्ट देण्यात आला आहे. उर्वरित राज्यात काही ठिकाणी विजांसह जोरदार पावसाची शक्यता असल्याने हवामान विभागाने सतर्कतेचा इशारा दिला आहे.

पुणे जिल्ह्यातील शिवाजीनगर परिसरात बुधवारी 0.2 मिलिमीटर पावसाची नोंद झाली. पुढील 24 तासात पुणे घाटमाथ्यावर जोरदार पावसाची शक्‍यता असल्याने सतर्कतेचा ऑरेंज अलर्ट देण्यात आला आहे. तसेच उर्वरित पुणे जिल्ह्यात हलक्या पावसाचा अंदाज वर्तवण्यात आला आहे. यावेळी कमाल तापमानाचा पारा 28 अंशावर स्थिर राहिल.

सातारा जिल्ह्यात मागील 24 तासात 4 मिलिमीटर पावसाची नोंद झाली. आज साताऱ्यातील कमाल तापमान 26 अंश सेल्सिअस राहिल. तसेच पुढील 24 तासांसाठी सातारा घाटमाथ्यावर जोरदार पावसाचा अंदाज असल्याने सतर्कतेचा यलो अलर्ट जारी केला आहे. तसेच उर्वरित सातारा जिल्ह्यात मध्यम पावसाची शक्यता आहे.

कोल्हापूर जिल्ह्यात मागील 24 तासात 20 मिलीमीटर पावसाची नोंद झाली. यावेळी कमाल तापमान 26.9 अंश सेल्सिअस वाढले आहे. आज कमाल तापमान 24 अंशावर राहिल. तसेच पुढील 24 तासांसाठी कोल्हापूर घाटमाथ्यावर जोरदार पावसाची शक्यता असल्याने हवामान विभागाने ऑरेंज अलर्ट दिला आहे. उर्वरित कोल्हापूर जिल्ह्यात मध्यम पावसाची शक्‍यता आहे.

सोलापूर जिल्हात मागील 24 तासात 0.8 मिलीमीटर पावसाची नोंद झाली. तसेच पारा तिशीपार जावून 31.2 अंश सेल्सिअस कमाल तापमानाची नोंद झाली. पुढील 24 तासात कमाल तापमान 30 अंशावर राहिल. तसेच सोलापूर जिल्ह्यात मध्यम पावसाची शक्यता हवामान विभागाकडून वर्तवण्यात आली आहे.

गेल्या 24 तासात सांगली जिल्ह्यामध्ये 5 मिलिमीटर पाऊस झाला. तसेच कमाल तापमानात घट होवून 29.4 अंश सेल्सिअस तापमानाची नोंद झाली. पुढील 24 तासात मध्यम पावसाची शक्यता आहे. यावेळी जिल्ह्यातील कमाल तापमान 27 तर कमान तापमान 22 अंश सेल्सिअस इतके राहील.

कोकण, घाटमाथ्यासह उत्तर महाराष्ट्रात पावसाचा जोर वाढण्याची शक्यता आहे. पुणे, कोल्हापूर आणि सातारा घाटमाथ्यावर मुसळधार पावसाची शक्यता असल्याने दक्षतेचा इशारा देण्यात आला आहे. सप्टेंबरच्या सुरुवातीपासूनच पावसाने पुन्हा जोर धरला आहे. काही ठिकाणी वातावरणातील कमाल तापमान वाढत आहे.