Weather Alert: पुढील 24 तास धोक्याचे! राज्यात अनेक ठिकाणी मुसळधार पाऊस, हवामान विभागाचा अलर्ट

गेल्या काही दिवसांत राज्यातील विविध भागांत पावसाचा जोर कमी जास्त होताना दिसून येत आहे. 3 जुलै रोजी राज्यातील काही भागांत पावसाचा जोर कमी राहणार असल्याची माहिती हवामान विभागानं दिली आहे. कोकण आणि पश्चिम महाराष्ट्रात मात्र मुसळधार पाऊस कायम राहण्याची शक्यता आहे. तर विदर्भ आणि मराठवाड्यात पावसाचा जोर कमी राहण्याची शक्यता आहे. पाहुयात 3 जुलै रोजी राज्यातील हवामानाची स्थिती कशी राहील.

कोकण विभागातील सर्वच जिल्ह्यांमध्ये तुरळक ठिकाणी मुसळधार पावसाची शक्यता असल्याचं हवामान विभागानं सांगितलंय. पालघर, ठाणे, मुंबई या तिन्ही जिल्ह्यांत तुरळक ठिकाणी मुसळधार पावसाची शक्यता असल्यानं पावसाचा यलो अलर्ट जारी करण्यात आला आहे. तर रायगड, रत्नागिरी, सिंधुदुर्ग या जिल्ह्यांसाठी ऑरेंज अलर्ट हवामान विभागाकडून देण्यात आला आहे.

पश्चिम महाराष्ट्रातील घाटमाथा परिसरात मुसळधार पावसाची शक्यता हवामान विभागानं वर्तवली आहे. पुणे घाटमाथा, कोल्हापूर घाटमाथा, सातारा घाटमाथा या तिन्ही ठिकाणी पावसाचा ऑरेंज अलर्ट जारी करण्यात आला आहे.

पुणे, सातारा, सांगली, सोलापूर, कोल्हापूर या सर्व जिल्ह्यांत हलक्या ते मध्यम स्वरूपाच्या पावसाची शक्यता आहे. मराठवाड्यातील छत्रपती संभाजीनगर, जालना, परभणी, बीड, हिंगोली, नांदेड, लातूर, धाराशिव या सर्व जिल्ह्यांत हलक्या ते मध्यम स्वरूपाच्या पावसाची शक्यता आहे. पावसाचा जोर कमी आल्याने कुठलाही अलर्ट जारी करण्यात आलेला नाही.

उत्तर महाराष्ट्रातील नाशिक, धुळे, नंदुरबार, जळगाव, अहिल्यानगर या सर्व जिल्ह्यांत हलक्या ते मध्यम स्वरूपाच्या पावसाची शक्यता आहे. तर नाशिक घाटमाथ्यावर तुरळक ठिकाणी मुसळधार पावसाची शक्यता असल्यानं पावसाचा यलो अलर्ट जारी करण्यात आला आहे.

विदर्भातील अकोला, अमरावती, भंडारा, बुलढाणा या सर्व जिल्ह्यांत विजांच्या कडकडाटासह हलक्या ते मध्यम स्वरूपाच्या पावसाची शक्यता आहे. इतर उर्वरित जिल्ह्यांत कुठलीही पावसाची शक्यता नाही.

राज्यातील एकंदरीत हवामानाचा अंदाज बघता असे लक्षात येते की, राज्यातील काही भागांत मुसळधार पावसाची शक्यता आहे. तर काही भागांत कुठलीही पावसाची शक्यता नाही. अशा परिस्थितीत शेतकऱ्यांनी पिकांची काळजी घेणे आवश्यक आहे.