Weather Alert: पश्चिम महाराष्ट्रात पावसाचं धुमशान, पुण्यासह या जिल्ह्यांत पुन्हा ऑरेंज अलर्ट

राज्यातील कोकण, घाटमाथ्यासह विदर्भात पावसाचा जोर कायम आहे. आज पुन्हा 21 जिल्ह्यांना पावसाचा इशारा देण्यात आला आहे. पश्चिम महाराष्ट्रातील घाटमाथ्याच्या भागात जोरदार पाऊस सुरू असून उर्वरित भागात मात्र तुरळक सरी बरसत आहेत. कोल्हापूर ते पुणे घाटमाथा भागात पुन्हा ऑरेंज अलर्ट देण्यात आला आहे. पुढील 24 तासांचा हवामान अंदाज जाणून घेऊ.

मागील 24 तासात कोल्हापूर परिसरात 16 मिलीमीटर पावसाची नोंद झाली. आज कोल्हापूर घाटमाथ्यावर जोरदार पावसाचा ऑरेंज अलर्ट कायम आहे. तसेच उर्वरित जिल्ह्यात ढगाळ आकाशासह हलक्या पावसाची शक्यता आहे. यावेळी कमाल तापमान 28 अंश सेल्सिअसवर राहिल.

मंगळवारी सातारा शहरात 14 मिलीमीटर पाऊस नोंदविण्यात आला. कमाल तापमान 26.5 अंश सेल्सिअस राहिले. पुढील 24 तासात कमाल तापमान 27 अंशावर राहील. ढगाळ आकाशासह हलक्या पावसाचा अंदाज भारतीय हवामान विभागाने वर्तवला आहे. सातारा जिल्ह्याच्या घाटमाथ्यावर जोरदार पावसाची शक्यता असल्याने सतर्कतेचा ऑरेंज अलर्ट दिला आहे.

पुणे जिल्ह्यातील शिवाजीनगर परिसरात गेल्या 24 तासात 3.7 मिलीमीटर पाऊस नोंदविण्यात आला. पुढील 24 तासात हलक्या पावसाची शक्यता हवामान विभागाने वर्तवली आहे. तसेच कमाल तापमान 29 अंशावर पोहचण्याचा अंदाज आहे. पुणे घाटमाथ्यावर जोरदार पावचसाची शक्यता असल्याने सतर्कतेचा ऑरेंज अलर्ट दिला आहे.

सोलापूर जिल्ह्यातील कमाल तापमानाचा पारा 32 अंशावर राहिला. तसेच. मागील 24 तासात 2 मिलीमीटर पावसाची नोंद झाली. पुढील 24 तासात हलक्या पावसाची शक्यता आहे. यावेळी पारा 32 अंशांवर राहिल.

सांगली जिल्ह्यात मंगळवारी 7 मिलिमीटर पावसाची नोंद झाली. पुढील 24 तासात सांगली जिल्ह्यात ढगाळ आकाशासह हलक्या पावसाचा अंदाज आहे. यावेळी जिल्ह्यातील कमाल तापमान 29 तर किमान तापमान 21 अंश सेल्सिअस इतके राहील.

पश्चिम महाराष्ट्रातील पाचही जिल्ह्यात गेल्या काही काळात पावसाची तीव्रता कमी झाली आहे. काही ठिकाणी शेतकऱ्यांनी पेरणी उरकली असून पावसाची वाट पाहात आहे. तर पुढील काही दिवस हवामानाची हीच स्थिती राहणार असून पुणे, कोल्हापूरसह सातारा, सांगली, सोलापुरात देखील हलका ते मध्यम पाऊस तुरळक ठिकाणी होण्याची शक्यता आहे.