Weather Alert: तुफान आलंया! राज्यात गुरुवारी वादळी पाऊस, 14 जिल्ह्यांना हवामान विभागाचा अलर्ट

राज्यात 17 जुलै रोजी अनेक भागांत ढगांच्या गडगडाटासह पावसाची शक्यता हवामान विभागाने वर्तवली आहे. कोकण, मध्य महाराष्ट्र, मराठवाडा आणि विदर्भातील विविध जिल्ह्यांत हलक्या ते मध्यम स्वरूपाचा पाऊस होण्याचा अंदाज आहे.

काही भागांत विजांच्या कडकडाट आणि वादळी वाऱ्यांचाही इशारा देण्यात आला आहे. पाहुयात, पुढील 24 तासांत राज्यातील हवामानाची स्थिती कशी राहील.

मुंबईमध्ये ढगांच्या गडगडाटासह हलका पाऊस होण्याची शक्यता वर्तवण्यात आली आहे. कोकण विभागातील ठाणे, पालघर, रायगड, रत्नागिरी आणि सिंधुदुर्ग या जिल्ह्यांमध्ये ढगाळ वातावरणासह हलक्या ते मध्यम स्वरूपाच्या पावसाची शक्यता आहे. पश्चिम महाराष्ट्रात विजांच्या कडकडाटासह पावसाची शक्यता आहे.

पुणे, सातारा, सांगली, सोलापूर आणि कोल्हापूर या जिल्ह्यांत विजांच्या कडकडाटासह हलक्या ते मध्यम स्वरूपाचा पाऊस पडू शकतो. विशेषतः सायंकाळी आणि रात्रीच्या वेळी नागरिकांनी सुरक्षिततेची काळजी घेणे आवश्यक आहे.

मराठवाड्यातील काही जिल्ह्यांना पावसाचा यलो अलर्ट जारी करण्यात आला आहे. छत्रपती संभाजीनगरसह जालना, परभणी, बीड आणि हिंगोली जिल्ह्यांत ढगांच्या गडगडाटासह हलक्या ते मध्यम स्वरूपाचा पाऊस पडण्याची शक्यता आहे. नांदेड, लातूर आणि धाराशिव जिल्ह्यांसाठी हवामान विभागाने यलो अलर्ट जारी केला असून या भागांत विजांच्या कडकडाटासह वादळी वाऱ्यांसह पाऊस होऊ शकतो.

उत्तर महाराष्ट्रात तुरळक ठिकाणी हलक्या पावसाची शक्यता आहे. नाशिक, धुळे, नंदुरबार, जळगाव आणि अहिल्यानगर या सर्व जिल्ह्यात काही ठिकाणी हलका पाऊस होण्याची शक्यता आहे.

17 जुलैसाठी संपूर्ण विदर्भाला पावसाचा यलो अलर्ट जारी करण्यात आला आहे.अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर, वर्धा, वाशिम आणि यवतमाळ या सर्व जिल्ह्यांमध्ये विजांच्या कडकडाटासह आणि वादळी वाऱ्यांसह पावसाची शक्यता आहे. विजांच्या कडकडाटासह पाऊस होण्याची शक्यता असल्याने नागरिकांनी बाहेर पडणे टाळावे, विद्युत उपकरणांपासून दूर राहावे आणि सुरक्षित ठिकाणी आसरा घ्यावा, असे आवाहन प्रशासनाकडून करण्यात आले आहे.