Weather Alert : महाराष्ट्रात पुढील 24 तासांत धो-धो पाऊस, 5 जिल्ह्यांना रेड तर 26 साठी यलो अलर्ट

राज्यात गेल्या काही दिवसांपासून मुसळधार पावसामुळे शेतीचे मोठे नुकसान झाले आहे. त्यातच आता हवामान विभागाने 28 सप्टेंबर रोजीही मुसळधार ते अति मुसळधार पावसाचा अंदाज वर्तवला आहे. त्यामुळे कोकण, पश्चिम महाराष्ट्र, मराठवाडा, उत्तर महाराष्ट्र आणि विदर्भ या विभागांना रेड, ऑरेंज आणि यलो अलर्ट जारी करण्यात आले आहेत. पाहुयात 28 सप्टेंबर रोजी राज्यातील हवामानाची स्थिती कशी राहील.

कोकण विभागातील पालघर, ठाणे, मुंबई आणि रायगड जिल्ह्यांत वादळी वाऱ्यासह तसेच विजांच्या कडकडाटासह अति मुसळधार पावसाची शक्यता आहे. त्यामुळे या जिल्ह्यांसाठी रेड अलर्ट देण्यात आला आहे. येथील नागरिकांनी सतर्कता बाळगणे गरजेचे आहे. रत्नागिरी आणि सिंधुदुर्ग जिल्ह्यांत मुसळधार ते अति मुसळधार पावसाचा अंदाज व्यक्त करण्यात आला आहे. या दोन जिल्ह्यांना पावसाचा ऑरेंज अलर्ट जारी करण्यात आला आहे.

पश्चिम महाराष्ट्रातील पुणे घाटमाथा परिसरात अति मुसळधार पावसाचा अंदाज असून त्या ठिकाणी रेड अलर्ट जारी करण्यात आला आहे. कोल्हापूर आणि सातारा घाटमाथा भागांत मुसळधार ते अति मुसळधार पाऊस होण्याची शक्यता आहे. त्यामुळे ऑरेंज अलर्ट देण्यात आला आहे. दरम्यान, पुणे, कोल्हापूर, सातारा, सांगली आणि सोलापूर जिल्ह्यांत मध्यम ते मुसळधार पाऊस होण्याचा अंदाज आहे. या सर्व जिल्ह्यांना यलो अलर्ट देण्यात आला आहे.

मराठवाड्यातील छत्रपती संभाजीनगर जिल्ह्यात मुसळधार ते अति मुसळधार पावसाची शक्यता आहे. त्या ठिकाणी ऑरेंज अलर्ट देण्यात आला आहे. तर जालना, परभणी, बीड, हिंगोली, नांदेड, लातूर आणि धाराशिव जिल्ह्यांत विजांच्या कडकडाटासह मध्यम ते मुसळधार पावसाचा अंदाज आहे. या सर्व जिल्ह्यांना यलो अलर्ट जारी करण्यात आला आहे.

उत्तर महाराष्ट्रातील धुळे, नंदुरबार, जळगाव आणि अहिल्यानगर जिल्ह्यांत विजांच्या कडकडाटासह मध्यम ते मुसळधार पाऊस पडणार असल्याचा अंदाज हवामान विभागाने वर्तवला आहे. या सर्व जिल्ह्यांसाठी यलो अलर्ट जारी केला आहे. नाशिकमध्येही मुसळधार पावसाची शक्यता आहे. त्यामुळे ऑरेंज अलर्ट जारी करण्यात आला आहे. तसेच नाशिक घाटमाथा परिसरात अति मुसळधार पावसाची शक्यता असल्याने रेड अलर्ट जारी करण्यात आला आहे.

विदर्भातील अकोला, बुलढाणा आणि वाशिम जिल्ह्यांत मुसळधार पावसाची शक्यता आहे. अमरावती, भंडारा, गडचिरोली, चंद्रपूर, गोंदिया, नागपूर, वर्धा आणि यवतमाळ जिल्ह्यांत वादळी वाऱ्यासह हलका ते मध्यम स्वरूपाचा पाऊस होण्याची शक्यता आहे. विदर्भातील सर्वच जिल्ह्यांना यलो अलर्ट जारी करण्यात आला आहे.

राज्यातील अनेक भागांत आधीच पावसामुळे पूरस्थिती निर्माण झाली आहे. त्यामुळे 28 सप्टेंबर रोजी संभाव्य अतिवृष्टीच्या पार्श्वभूमीवर नागरिकांनी सुरक्षित ठिकाणी आसरा घ्यावा. अनावश्यक प्रवास टाळावा आणि स्थानिक प्रशासनाच्या सूचनांचे पालन करावे, असे आवाहन हवामान विभागाकडून करण्यात आले आहे.