Weather Alert : महाराष्ट्रासाठी पुढील 24 तास महत्त्वाचे! वातावरण पुन्हा बदललं, हवामान खात्याचं अपडेट

मागील दोन दिवस राज्यातील अनेक जिल्ह्यांत थंडी पहायला मिळाली. परंतु आज राज्यातील नागरिकांना काहीसा दिलासा मिळाला आहे. किमान तापमानात 1 ते 2 अंश सेल्सिअसने वाढ झाल्याने गारठा कमी जाणवत आहे. पाहुयात 4 डिसेंबर रोजी राज्यात हवामान कसं असेल.

मुंबई शहर आणि उपनगरांसह कोकणात हवामान मुख्यतः कोरडे असेल. तर मुंबईतील किमान तापमानात 2 अंशाने वाढ होईल. मुंबईत किमान तापमान 19 अंश सेल्सिअस तर कमाल तापमान 34 अंश सेल्सिअस राहील.

पुणेकरांना देखील वाढत्या गारव्यापासून काहीसा दिलासा मिळणार आहे. पुण्यातील किमान तापमानात 1 अंश सेल्सिअसने वाढ होईल. यामुळे पुण्यासह पश्चिम महाराष्ट्रातील नागरिकांना दिलासा मिळणार आहे. पुण्यात 12 तर कोल्हापूरमध्ये 20 अंश सेल्सिअस इतके किमान तापमान राहील.

उत्तर महाराष्ट्रात देखील गारठा कमी झाला आहे. नाशिकमध्ये किमान तापमान 9 अंश सेल्सिअसवरून 11 अंश सेल्सिअसपर्यंत पोहोचले. तर जळगाव आणि उर्वरित उत्तर महाराष्ट्रात देखील गारठा कमी झाल्याचे पहायला मिळेल.

मराठवाड्यात गारठा कायम राहण्याची शक्यता आहे. मराठवाड्यातील जिल्ह्यांत किमान तापमान स्थिर राहण्याचा अंदाज आहे. छत्रपती संभाजीनगर तसेच नांदेडमध्ये किमान तापमान 11 अंश सेल्सिअस राहील.

विदर्भातील किमान तापमानात देखील फारसा चढ-उतार होणार नाही. नागपूरमध्ये 11 तर अमरावतीत 13 अंश सेल्सिअस एवढं किमान तापमान राहील.

दरम्यान, राज्यातील शीतलहरीचा सामना करणाऱ्या उत्तर मध्य महाराष्ट्रातील नागरिकांना किमान तापमानात वाढ झाल्याने काहीसा दिलासा मिळणार आहे.