नीलम ते हिरा… कोणतेही रत्न धारण केल्यानंतर करू नका 'या' चुका; अन्यथा भोगावे लागतील उलट परिणाम!

ज्योतिषशास्त्रामध्ये ग्रहांचे दोष निवारण्यासाठी आणि नशिबाची साथ मिळवण्यासाठी रत्न धारण करण्याचा सल्ला दिला जातो. नीलम, पुष्कराज किंवा माणिक ही रत्ने अत्यंत प्रभावशाली मानली जातात. मात्र, अनेकदा लोक रत्न तर धारण करतात, पण त्यानंतर पाळायचे नियम विसरतात. रत्नशास्त्रानुसार, एकदा रत्न धारण केले की तुमच्या शरीरातील ऊर्जेचे चक्र बदलू लागते.

वारंवार रत्न उतरवणे: अनेक जण कामाच्या सोयीसाठी किंवा झोपताना अंगठी उतरवून ठेवतात. रत्न एकदा धारण केले की ते पुन्हा पुन्हा काढू नये. असे केल्याने ग्रहाचा तुमच्या शरीराशी असलेला संपर्क तुटतो आणि रत्नाचा प्रभाव कमी होतो. जर काही कारणास्तव रत्न उतरावे लागले, तर पुन्हा घालताना ते शुद्ध करूनच धारण करावे.

तामसिक आहार आणि व्यसने: पुखराज आणि नीलम यांसारखी रत्ने सात्त्विक मानली जातात. विशेषतः पुखराज धारण केलेल्या व्यक्तींनी मांसाहार, मद्यपान आणि तंबाखू यांसारख्या गोष्टींपासून लांब राहावे. अशुद्ध आहारामुळे रत्नाची शक्ती नकारात्मक ऊर्जेत बदलू शकते, ज्यामुळे मानसिक अस्वस्थता निर्माण होते.

दुसऱ्याचे रत्न परिधान करणे: कधीही कोणाचेही वापरलेले रत्न किंवा दुसऱ्याची अंगठी मागून घालू नका. प्रत्येक रत्नामध्ये त्या व्यक्तीच्या ऊर्जेचे अंश असतात. दुसऱ्याचे रत्न घातल्याने त्याच्या आयुष्यातील नकारात्मकता तुमच्याकडे येऊ शकते. रत्न नेहमी स्वतःच्या नावाने अभिमंत्रित करूनच घ्यावे.

तुटलेले किंवा तडा गेलेले रत्न वापरणे: जर तुमच्या रत्नाला तडा गेला असेल किंवा त्याचा कोपरा निघाला असेल, तर ते ताबडतोब बदला. फुटलेले रत्न धारण करणे अत्यंत अशुभ मानले जाते. यामुळे शुभ फळांऐवजी अपघाताची भीती किंवा आर्थिक हानी होऊ शकते.

शत्रू ग्रहांची रत्ने एकत्र घालणे: रत्नशास्त्रात काही ग्रहांची एकमेकांशी शत्रूता असते. उदा. पुष्कराजसोबत कधीही नीलम, हिरा किंवा गोमेद घालू नये. परस्परविरोधी ग्रहांची रत्ने एकत्र घातल्याने जीवनात वादळे निर्माण होऊ शकतात.

स्वच्छतेकडे दुर्लक्ष करणे: रत्नावर साचलेली धूळ किंवा मळ त्याच्या किरणांना शरीरात जाण्यापासून रोखते. वेळोवेळी तुमचे रत्न गंगाजल किंवा शुद्ध पाण्याने स्वच्छ करा. जर रत्नाचा त्वचेशी संपर्क होत नसेल, तर त्याचा काहीही उपयोग होत नाही. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)